Supreme Court: મણિપુર કેસમાં સુપ્રીમ કોર્ટે ઉઠાવ્યા સવાલ, કહ્યું- મહિલાઓને ટોળાના હવાલે કરનારા પોલીસકર્મીઓની પૂછપરછ થઈ?

સુપ્રીમ કોર્ટ મણિપુરમાં મહિલાઓ સાથે થયેલા અત્યાચાર મામલે ખફા છે. ગઈકાલે હાથ ધરવામાં આવેલી સુનાવણીમાં સુપ્રીમ કોર્ટે નિર્દેશ કર્યો છે કે રાજ્યમાં દુષ્કર્મ, હત્યા અને ધાર્મિક સ્થળો પર હુમલાની જેટલી પણ ફરિયાદ નોંધાઈ છે તેની માહિતી પુરી પાડવામાં આવે.

નવી દિલ્હી: સુપ્રીમ કોર્ટે હિંસાગ્રસ્ત મણિપુરમાં બે મહિલાઓ સાથે કરવામાં આવેલી અમાનવીયતા અંગે મોટા પ્રશ્નો ઉઠાવ્યા છે. પોલીસ તપાસ પર સવાલ ઉઠાવતા જસ્ટિસ ડીવાય ચંદ્રચુડે પૂછ્યું કે મહિલાઓના નિવેદનો છે કે પોલીસકર્મીઓએ તેમને ટોળાને સોંપી દીધા. શું તે પોલીસકર્મીઓની પૂછપરછ કરવામાં આવી છે? શું ડીજીપીએ પૂછપરછ કરી છે? ડીજીપી શું કરી રહ્યા છે? તે તેની ફરજ છે.

સુપ્રીમ કોર્ટના નિર્દેશ: સુનાવણી દરમિયાન ચીફ જસ્ટિસ ડીવાય ચંદ્રચુડ, જસ્ટિસ જેબી પારડીવાલા અને જસ્ટિસ મનોજ મિશ્રાની ખંડપીઠે રાજ્યને નિર્દેશ આપ્યો કે કેટલી એફઆઈઆર હત્યા અને બળાત્કાર સાથે સંબંધિત છે અને કેટલી અગ્નિદાહ, સંપત્તિના નુકસાન, મહિલાઓની પ્રતિષ્ઠા, વિનાશ સાથે સંબંધિત છે આ ઉપરાંત ધાર્મિક સ્થળોના નુકસાન સબંધિત હોય તેની માહિતી આપવી. બેન્ચે રાજ્યને ઘટનાની તારીખ, કેસ નોંધવાની તારીખ, ધરપકડ સહિતની તમામ વિગતો સાથે સુનાવણીની આગામી તારીખે આવવા જણાવ્યું હતું.

સીબીઆઈએ જાતીય હિંસાના તમામ 11 કેસોની તપાસ કરવી જોઈએ: તુષાર મહેતાએ કહ્યું કે હિંસાના કેસોની તપાસ સીબીઆઈને સોંપવી જોઈએ. આના પર, બેન્ચે કહ્યું, તમામ કેસ સીબીઆઈને ટ્રાન્સફર કરવું અશક્ય છે કારણ કે તે કેન્દ્રીય એજન્સી પણ તૂટી જશે. મહેતાએ કહ્યું કે, હાલનો પ્રસ્તાવ યૌન હિંસાના 11 કેસ સીબીઆઈને ટ્રાન્સફર કરવાનો છે. આના પર CJIએ કહ્યું, તેથી આ 6532 FIRને વિભાજિત કરવા માટે એક મિકેનિઝમની જરૂર છે.

પોલીસ 6 જુલાઈથી ગુમ થયેલા બે વિદ્યાર્થીઓને શોધી કાઢવામાં નિષ્ફળ: મણિપુરમાં 6 જુલાઈથી ગુમ થયેલા બે વિદ્યાર્થીઓને શોધી કાઢવામાં પોલીસ નિષ્ફળ ગઈ હતી. આનાથી નારાજ થઈને મંગળવારે સેંકડો લોકોએ પોલીસ વિરુદ્ધ પ્રદર્શન કર્યું. વિરોધમાં ભાગ લેનારી મોટાભાગની મહિલાઓ મુખ્યમંત્રી આવાસ અને રાજભવન તરફ કૂચ કરી રહી હતી. પોલીસે પ્રદર્શનકારીઓને મુખ્યમંત્રી આવાસ આગળ અટકાવ્યા હતા.

મણિપુર કોંગ્રેસે ભાજપના ધારાસભ્યના નિવેદન પર પ્રતિક્રિયા માંગી: મણિપુર કોંગ્રેસે ભાજપના કુકી ધારાસભ્ય પાઓલિનલાલ હોકીપના નિવેદન પર રાજ્ય સરકાર અને રાજ્ય ભાજપ પાસેથી સ્પષ્ટતા માંગી છે, જેમાં તેમણે રાજ્યને ત્રણ કેન્દ્રશાસિત પ્રદેશોમાં વિભાજીત કરવાની વાત કરી છે. પ્રદેશ કોંગ્રેસ ઉપાધ્યક્ષ હરેશ્વર ગોસ્વામીએ કહ્યું કે, પાર્ટી હાઓકીમની ટિપ્પણીની સખત નિંદા કરે છે.