લખનઉ : 22 જાન્યુઆરીએ અયોધ્યામાં રામ મંદિરનું ભવ્ય ઉદ્ઘાટન અને શ્રી રામ લલાના પ્રાણ પ્રતિષ્ઠા ઉત્સવને અમેરિકાના ટાઇમ્સ સ્ક્વેરથી યુરોપના એફિલ ટાવર સુધી જોવા મળશે. ફ્રાન્સની રાજધાની પેરિસમાં 21 જાન્યુઆરીએ રામ રથયાત્રાનું આયોજન કરવામાં આવ્યું છે. જેમાં સમગ્ર યુરોપમાંથી એક હજાર લોકો એકત્ર થશે. તેમજ એફિલ ટાવર પાસે ઉજવણી કરવામાં આવશે. તેવી જ રીતે, પ્રાણ પ્રતિષ્ઠા કાર્યક્રમનું અમેરિકામાં ટાઈમ્સ સ્ક્વેર ખાતે જીવંત પ્રસારણ કરવામાં આવશે.
પેરિસમાં રામ રથયાત્રા : 21 જાન્યુઆરી 2024ના રોજ પેરિસમાં રામ રથયાત્રાનું આયોજન કરવામાં આવ્યું છે. સોશિયલ મીડિયા પર પેરિસમાં રહેતા અવિનાશ મિશ્રા નામના યુઝરે રામ રથયાત્રા વિશે વિગતો શેર કરી છે. તેમણે લખ્યું છે કે 'ફ્રાન્સમાં રહેતા અમે ભારતીયો અયોધ્યામાં શ્રી રામ મંદિરના પ્રાણ પ્રતિષ્ઠાના ઐતિહાસિક અને મહત્વપૂર્ણ અવસરમાં સમગ્ર પેરિસમાં રામ રથયાત્રાનું આયોજન કરીને અને એફિલ ટાવર પર જંગી ઉજવણી કરીને ભાગ લઈશું. અવિનાશે પોસ્ટમાં રામ રથયાત્રાનો નકશો પણ શેર કર્યો છે. પેરિસમાં રહેતા રામ ભક્તોને પણ આ કાર્યક્રમમાં ભાગ લેવા વિનંતી કરવામાં આવી છે.
ટાઈમ્સ સ્ક્વેર પર લાઈવ સ્ટ્રીમિંગ થશે : હિંદુ ટેમ્પલ એમ્પાવરમેન્ટ કાઉન્સિલે ઉત્તર અમેરિકાથી લઈને કેનેડા સુધીના મંદિરોમાં પૂજા અને લાઈટ ફેસ્ટિવલનું આયોજન કરવાનો નિર્ણય લીધો છે. છેલ્લા કેટલાક અઠવાડિયામાં વોશિંગ્ટન, શિકાગો અને અન્ય અમેરિકન શહેરોમાં રામ મંદિરની ઉજવણીમાં કાર રેલીઓ કાઢવામાં આવી છે. આયોજકોએ હવે કેલિફોર્નિયામાં કાર રેલી યોજવાનું આયોજન કર્યું છે. તેઓનું કહેવું છે કે તે અયોધ્યા આવી શકતાં નથી, પરંતુ ભગવાન રામ તેમના હૃદયમાં છે અને તેમના ઘરે પાછા ફરવાની અતૂટ શ્રદ્ધા છે. એટલું જ નહીં, 22 જાન્યુઆરીએ પ્રાણ પ્રતિષ્ઠા કાર્યક્રમનું લાઈવ ટેલિકાસ્ટ પણ ન્યૂયોર્ક સિટીના ટાઈમ્સ સ્ક્વેર ખાતે કરવામાં આવશે. અગાઉ, 5 ઓગસ્ટ, 2020ના રોજ, રામ મંદિરના ભૂમિપૂજન માટે ટાઇમ્સ સ્ક્વેર ખાતે રામ મંદિરનું ડિજિટલ બિલબોર્ડ ચલાવવામાં આવ્યું હતું. અયોધ્યા રામ મંદિરના ઉદ્ઘાટન પર ન્યૂયોર્ક સિટીના મેયર એરિક એડમે કહ્યું છે કે જો આપણે ન્યૂયોર્ક સિટીમાં હિન્દુ સમુદાય પર નજર કરીએ તો આ કાર્યક્રમ ખૂબ જ મહત્વપૂર્ણ છે. આ કાર્યક્રમ તેમની આધ્યાત્મિકતાની લાગણીને વધુ ઉજ્જવળ બનાવવાની તક આપે છે.
નોર્થ અમેરિકા અને કેનેડાના મંદિરોમાં થશે પૂજા : રાજ્ય સરકાર દ્વારા જારી કરવામાં આવેલી અખબારી યાદીમાં કહેવામાં આવ્યું છે કે ઉત્તર અમેરિકાથી લઈને કેનેડા સુધીના મંદિરોમાં પૂજા અને લાઇટના ઉત્સવનું આયોજન કરવાનો નિર્ણય લેવામાં આવ્યો છે. અમેરિકામાં, કેલિફોર્નિયા તેમજ વોશિંગ્ટન, શિકાગો અને અન્ય શહેરોમાં વિશાળ કાર રેલીનું આયોજન કરવામાં આવશે. પ્રાણ પ્રતિષ્ઠા ભારતીય સમય અનુસાર બપોરે 12.30 વાગ્યે થશે. તે સમયે પેરિસમાં સવાર અને અમેરિકામાં મોડી રાત હશે.
