- કોરોના ટેસ્ટ કરાવ્યા બાદ 7 દિવસે રિપોર્ટ આવ્યો
- પુત્રીના લગ્નના બીજા જ દિવસે રિપોર્ટ આવ્યો પોઝિટિવ
- લગ્નપ્રસંગમાં હાજરી આપનારા તમામ લોકો ચિંતામાં
પટના: કોરોના સમયગાળામાં લગ્ન અને અન્ય આયોજનો યોજનારાઓ માટે આ સમાચાર બોધપાઠથી ભરેલા છે. એક પિતાનું પોતાની પુત્રીના લગ્નના 5માં જ દિવસે મૃત્યુ કોરોનાથી થયું હતું. આ સમાચાર જાણ્યા બાદ લગ્ન સમારોહમાં આવેલા લોકોની ચિંતા વધી ગઈ છે.
7 દિવસ પછી મળ્યો હતો કોરોના રિપોર્ટ
20 એપ્રિલના રોજ સોહન સાવ નામના વ્યક્તિએ બાઢ બ્લોકના બિચલી મલાહી ગામમાં RT-PCR ટેસ્ટ કરાવ્યો હતો અને 7 દિવસ પછી એટલે કે 27 એપ્રિલના રોજ રિપોર્ટ પોઝિટિવ આવ્યો હતો. ડોક્ટરોની સલાહ મુજબ તેમને હોમ આઈસોલેશનમાં રાખવામાં આવ્યા હતા, પરંતુ 1 મેના રોજ તેમને શ્વાસ લેવામાં તકલીફ થયા બાદ તેમનું મોત નિપજ્યું હતું.
26 એપ્રિલે જ પુત્રીના લગ્ન ધામધૂમથી કર્યા હતા
26 એપ્રિલે સોહન સાવના ઘરે તેમની પુત્રીના લગ્ન ખૂબ જ ધામધૂમથી થયાં હતાં. તેઓએ ખુશીથી તેમની પુત્રીને વિદાય આપી હતી, પરંતુ તેના ફક્ત 5 દિવસ પછી કોરોનાને કારણે તેઓ મૃત્યુ પામ્યા હતા. આ સમાચાર જાણી લીધા બાદ લગ્ન સમારોહમાં ઉપસ્થિત રહેલા ગ્રામજનો સહિત તમામ લોકોની ચિંતા વધી ગઈ છે.
