- કરનાલમાં ખેડૂતોનું પ્રદર્શન ઉગ્ર બન્યું
- સચિવાલય ઘેરવા માટે ખેડૂતોએ કરી કૂચ
- અનેક ખેડૂતોની પોલીસે કરી અટકાયત
- સચિવાલયમાં જબરદસ્તી ઘૂસવાનો પ્રયત્ન
કરનાલ: હરિયાણાના કરનાલમાં જિલ્લા મુખ્યમથક સુધી પ્રદર્શન માટે ખેડૂતો એકઠા થયા છે. ત્યાં અત્યારે તણાવની સ્થિતિ પેદા થઈ છે. કરનાલમાં જિલ્લા મુખ્યમથક સુધી વિરોધ રેલીની પરવાનગીને લઇને ખેડૂતો અને અધિકારીઓની વચ્ચે વાતચીત નિષ્ફળ ગઈ છે. કહેવામાં આવી રહ્યું છે કે મિની સચિવાલય તરફ કૂચ કરી રહેલા ખેડૂતોની પોલીસે અટકાયત કરી છે. ખેડૂતોનું વિરોધ પ્રદર્શન હવે ઉગ્ર થઈ ગયું છે. વહીવટીતંત્ર સાથે વાતચીત નિષ્ફળ રહ્યા બાદ સચિવાલય ઘેરવા નીકળેલા ખેડૂતો પર પાણીનો મારો કરવામાં આવી રહ્યો છે. ખેડૂતોએ જબરદસ્તી સચિવાલયમાં ઘૂસવાનો પ્રયત્ન કર્યો હતો.
2 કલાક સુધી ચાલેલી વાતચીત એકવાર ફરી નિષ્ફળ રહી
વહીવટી તંત્રની સાથે 2 સ્તરની વાતચીત નિષ્ફળ થયા બાદ ખેડૂતો હવે સચિવાલયને ઘેરવા નીકળ્યા છે. કરનાલમાં થયેલા લાઠીચાર્જના વિરોધમાં ખેડૂતો પ્રદર્શન કરી રહ્યા છે. આ પહેલા મુદ્દાને ખત્મ કરવા માટે જિલ્લા વહીવટી તંત્રએ સંયુક્ત કિસાન મોરચાના નેતાઓને વાતચીત માટે બોલાવ્યા હતા, પરંતુ આ વાતચીત નિષ્ફળ રહી. ત્યારબાદ વહીવટી તંત્રએ ફરીવાર ખેડૂત નેતાઓને વાતચીત માટે બોલાવ્યા. ખેડૂતોનું 11 સભ્યોનું ગ્રુપ જેમાં 4 અન્ય ખેડૂત નેતાઓ સામેલ થયા અને કુલ 155 ખેડૂત નેતાઓએ જિલ્લા વહીવટીતંત્રની સાથે બીજીવાર વાતચીત કરી. લગભગ 2 કલાક સુધી ચાલેલી વાતચીત આખરે એકવાર ફરી નિષ્ફળ રહી. આ બેઠક બાદ ખેડૂત નેતા યોગેન્દ્ર યાદવે જણાવ્યું કે, અમારી વહીવટી તંત્ર સાથે ત્રણ સ્તરની વાતચીત થઈ, જેમાં 15 સભ્યોનું જૂથ સામેલ હતું, જેમાં રાષ્ટ્રીય નેતૃત્વ, રાજ્ય નેતૃત્વ તેમજ સ્થાનિક નેતા સામેલ રહ્યા.
કરનાલ જિલ્લામાં કલમ-144 લાગુ, ઇન્ટરનેટ સેવાઓ બંધ
તેમણે કહ્યું કે, અમે કરનાલ વહીવટી તંત્ર સાથે બિલકુલ ઓછામાં ઓછી વાત કરી છે કે કરનાલ એસડીએમની વિરુદ્ધ કાર્યવાહી થવી જોઇએ અને તેમને સસ્પેન્ડ કરવામાં આવે, પરંતુ વહીવટી તંત્ર ના માન્યું, જેના કારણે વાતચીત નિષ્ફળ રહી. તો ભારતીય કિસાન યુનિયનના રાષ્ટ્રીય પ્રવક્તા રાકેશ ટિકૈતે કહ્યું કે, સરકારનો ઇરાદો ઘર્ષણની સ્થિતિ પેદા કરવાનો છે. સરકાર ઉકેલ લાવવા નથી ઇચ્છતી. હવે આગામી નિર્ણય અનાજ મંડીમાં ભેગા થયેલા ખેડૂતોની મહાપંચાયતમાં થશે. ખેડૂત મહાપંચાયત અને લઘુ સચિવાલય ઘેરાવને લઇને જિલ્લા વહીવટી તંત્ર હાઈ એલર્ટ પર છે. કરનાલ જિલ્લામાં કલમ-144 લાગુ છે. સોમવાર રાત્રે 12 વાગ્યાથી કરનાલ જિલ્લામાં ઇન્ટરનેટ સેવાઓ પણ બંધ કરી દેવામાં આવી છે.
સાર્વજનિક વ્યવસ્થા જાળવી રાખવાની ચેતવણી
દિલ્હીથી ચંદીગઢ અને અંબાલા જનારા હાઇવેનો ટ્રાફિક પણ ડાયવર્ટ કરી દેવામાં આવ્યો છે. સમગ્ર જિલ્લામાં વહીવટી તંત્રએ પોલીસ, સુરક્ષા દળો અને પેરામિલિટ્રી ફોર્સ તહેનાત કરી છે. સચિવાલયની બહાર રેપિડ એક્શન ફૉર્સ તહેનાત છે. પોલીસ અને વહીવટીતંત્રે ખેડૂત નેતાઓ સાથે વાત કરી છે જેમણે આવા તત્વોને કાર્યક્રમસ્થળ છોડવા મનાવવાનો પ્રયત્ન કર્યો, પરંતુ તેઓ પોતાના નેતાઓનું માની નથી રહ્યા. કરનાલ જિલ્લા વહીવટી તંત્ર અને પોલીસ દ્વારા આવા બદમાશોને કાયદો હાથમાં ન લેવા અને સાર્વજનિક વ્યવસ્થા બનાવી રાખવાની ચેતવણી આપવામાં આવી રહી છે.
કોઈપણ અવ્યવસ્થાને પહોંચી વળવા વહીવટી તંત્ર તૈયાર: અનિલ વિજ
આ મામલે ગૃહમંત્રી અનિલ વિજે સખ્તાઈ દર્શાવતા કહ્યું કે, વહીવટી તંત્ર કોઈપણ અવ્યવસ્થાને પહોંચી વળવા માટે તૈયાર છે. કોઈને પણ કાયદો હાથમાં નહીં લેવા દેવામાં આવે. અનિલ વિજે ખેડૂતોને અપીલ કરી છે કે તેઓ પોતાનું પ્રદર્શન શાંતિપૂર્વક કરે.
