કર્ણાટક: ભાજપના રાષ્ટ્રીય અધ્યક્ષ જેપી નડ્ડાએ કર્ણાટકના બલ્લારીમાં જનસભાને સંબોધિત કરતા નિવેદન આપ્યું છે.(JP Nadda Slams Congress ) અહીં તેમણે આદિવાસીઓના પ્રશ્નો ઉઠાવ્યા હતા. વાસ્તવમાં, અહીં તેમણે કહ્યું હતું કે '70 વર્ષથી, બીજેપી સિવાય, અન્ય કોઈએ ક્યારેય દેશમાં આદિવાસીઓની કાળજી લીધી નથી અને તેમને સમાન પ્રતિનિધિત્વ આપ્યું નથી.' આ સાથે તેમણે આગળ કહ્યું- 'આજે પહેલીવાર ભાજપે એક આદિવાસી મહિલાને ભારતના રાષ્ટ્રપતિ બનાવ્યા.'
વાલ્મિકી સમુદાય: આ ઉપરાંત તેમણે એમ પણ કહ્યું હતું કે 'આજે ભાજપ સરકાર આદિવાસી સમાજના વિકાસ માટે પ્રતિબદ્ધ છે. આદિવાસી શિષ્યવૃત્તિ હોય, એકલવ્ય વિદ્યાલય હોય, આવાસ, શિક્ષણ અને આરોગ્ય હોય, આદિવાસી ભાઈ-બહેનો માટેની દરેક યોજનામાં પ્રાથમિકતા આપવામાં આવી છે.' આગામી વર્ષે એપ્રિલમાં થનારી કર્ણાટક વિધાનસભાની ચૂંટણી માટે રાજ્યમાં પાર્ટીને મજબૂત કરવાના હેતુથી પાર્ટી દ્વારા આ એક મોટો આઉટરીચ પ્રોગ્રામ હતો. કર્ણાટકમાં કુલ 224 બેઠકો છે, જેમાંથી ભાજપ લગભગ 70 SC/ST બેઠકો પર લક્ષ્યાંક ધરાવે છે. વાલ્મિકી સમુદાય પાસે વિધાનસભાની 40 બેઠકો છે.
SC/ST મતોને મજબૂત કરવા: જ્યારથી મલ્લિકાર્જુન ખડગે કોંગ્રેસ પાર્ટીના અધ્યક્ષ બન્યા છે, ભાજપ કર્ણાટક તેમજ દેશના અન્ય રાજ્યોમાં તેના SC/ST મતોને મજબૂત કરવા માટે સખત મહેનત કરી રહી છે. રાજ્યમાં લગભગ છ મહિનામાં યોજાનારી વિધાનસભાની ચૂંટણીઓ પહેલા ભાજપ અનુસૂચિત જાતિ (SC) અને અનુસૂચિત જનજાતિ (ST) ના સભ્યોને આકર્ષવા માટે આક્રમક રીતે કામ કરી રહી છે.
રેલીને પણ સંબોધિત: કોંગ્રેસ પાર્ટી પણ તેની ભારત જોડો યાત્રા દ્વારા પોતાની પાર્ટીને મજબૂત કરવા માટે એસસી/એસટીને સાથે લઈને કામ કરી રહી છે. રાહુલ ગાંધીએ ગયા મહિને બલ્લારીમાં એક રેલીને પણ સંબોધિત કરી હતી. રાહુલ ગાંધીએ કહ્યુ હતુ કે ,"મારા પરિવારનો કર્ણાટક સાથે લાંબો સંબંધ છે. હું ક્યારેય ભૂલી શકતો નથી કે તમે (લોકોએ) ચિક્કામગાલુરુમાંથી (પૂર્વ PM) ઈન્દિરા ગાંધીને (1978માં) જીત અપાવી હતી. હું એ પણ ભૂલી શકતો નથી કે તમે બલ્લારીમાં સોનિયા ગાંધીને જીત અપાવી હતી."
એકમાત્ર કાર્યક્રમ નથી: કર્ણાટક સરકારને લક્ષ્યાંકિત પ્રેક્ષકોમાં કેન્દ્ર સરકારની નીતિઓ અને લાભોની પહોંચ વધારવાનો આદેશ આપવામાં આવ્યો છે. ઉપરાંત, જિલ્લા મેજિસ્ટ્રેટને લાભાર્થીઓની નોંધણી વધારવા માટે કહેવામાં આવ્યું છે. કર્ણાટક ભાજપના એક સૂત્રએ જણાવ્યું હતું કે, આ એકમાત્ર કાર્યક્રમ નથી, દર અઠવાડિયે આના જેવા બીજા ઘણા કાર્યક્રમો પણ ગોઠવવામાં આવશે.
