ગ્વાલિયર : હાઈકોર્ટની ગ્વાલિયર બેંચે (Decision of MP Gwalior High Court) કથિત રીતે ધર્મ પરિવર્તન કરીને ધાર્મિક સંસ્થાઓ પાસેથી લગ્નનું પ્રમાણપત્ર (religious organization cannot convert religion) મેળવવાને લઈને મોટો નિર્ણય આપ્યો છે. હાઈકોર્ટે કહ્યું છે કે, કોઈ પણ ધાર્મિક સંસ્થાને યુવક કે યુવતીને ધર્મ બદલવાનો અધિકાર નથી. કલેક્ટરને યોગ્ય રીતે અરજી કર્યા પછી જ આ કરી શકાશે. મુસ્લિમમાંથી હિંદુ બનેલી છોકરીના કેસમાં હાઈકોર્ટે કહ્યું છે કે, નારી નિકેતનમાં રહેતી આ છોકરીને એક અઠવાડિયાની અંદર ત્યાંથી મુક્ત કરવામાં આવે.
ધાર્મિક સંસ્થા ધર્મ પરિવર્તન કરી શકશે નહીં : કોર્ટે કહ્યું કે, છોકરી પુખ્ત છે. તેથી તે ગમે ત્યાં જવા માટે સ્વતંત્ર છે. જો છોકરી તેના માતા-પિતા સાથે જવા તૈયાર ન હોય તો તે તેના બોયફ્રેન્ડ સાથે પણ જઈ શકે છે. વાસ્તવમાં ગ્વાલિયરના રહેવાસી રાહુલ યાદવ અને હિના ખાન નામની યુવતીએ ગાઝિયાબાદના એક આર્ય સમાજ મંદિરમાંથી ધર્મ પરિવર્તન કરીને લગ્નનું પ્રમાણપત્ર મેળવ્યું હતું. આ દરમિયાન યુવતીના પરિવારજનોએ રાહુલ વિરુદ્ધ કેસ દાખલ કર્યો હતો. છોકરા અને છોકરીને પોલીસે રિકવર કરી લીધા હતા, પરંતુ છોકરી તેના માતા-પિતા સાથે જવા માટે રાજી ન હતી. ત્યારબાદ તેણીને નારી નિકેતન મોકલવામાં આવી હતી. હાઈકોર્ટે કહ્યું છે કે, કોઈપણ ધાર્મિક સંસ્થા કોઈનું ધર્માંતરણ કરી શકશે નહીં. આ માટે ધર્મ પરિવર્તન કરવા ઇચ્છુક લોકોએ જિલ્લા કલેક્ટર સમક્ષ તેમની યોગ્ય અરજી આપવાની રહેશે. આ સાથે જ કોર્ટે રાહુલ અને હિનાના લગ્નને રદબાતલ જાહેર કર્યા છે.
