હૈદરાબાદ (તેલંગાણા): રાજ્ય સરકાર દ્વારા રૂપિયા 1,500ની આર્થિક સહાય મેળવવા શુક્રવારે તેલંગાણામાં એક બેન્ક સમક્ષ કતારમાં રાહ જોતા એક મહિલાનું મોત થયું છે.
આ ઘટના કામરેડ્ડી જિલ્લાના રામારેડ્ડી 'મંડલ' (બ્લોક) ના મુખ્ય મથકની છે. જ્યાં તેલંગણા ગ્રામીણા બેન્કમાં કતારમાં ઉભા રહેલી મહિલા અચાનક ઢળી પડી હતી. તેને તાત્કાલિક નજીકની હોસ્પિટલમાં લઈ જવામાં આવી હતી. પરંતુ માર્ગમાં તેનું મોત થયું હતું. આ તપાસમાં જાણવા મળ્યું હતું કે, આદિવાસી મહિલાનું મૃત્યુ હૃદય હુમલાના કારણે થયું હોવાનું સામે આવ્યું હતું.
કોંગ્રેસના નેતા અને પૂર્વ મંત્રી મોહમ્મદ અલી શબ્બીરે મહિલાની મોત માટે રાજ્ય સરકારને જવાબદાર ગણાવી હતી. તેણે કહ્યું કે, પીડિતા છેલ્લા બે દિવસથી પૈસા માટે બેન્કમાં આવી રહી હતી અને સળગતા તડકા હેઠળ કલાકો સુધી ઉભી હતી.
તેમણે કામરેડ્ડી સરકારી હોસ્પિટલની મુલાકાત લીધી હતી, જ્યાં મૃતદેહને શબપરીક્ષણ માટે લેવામાં આવ્યો હતો. પરિવારના સભ્યોને સાંત્વના આપી હતી અને કેટલીક આર્થિક મદદ પણ કરી હતી. તેમણે માગણી કરી છે કે, સરકાર પીડિત પરિવારને વળતર ચૂકવે.
લૉકડાઉન હોવા છતાં મોટી સંખ્યામાં લાભાર્થીઓ પૈસા ઉપાડવા માટે રાજ્યભરની બેન્કો પર કતારોમાં ઉભા છે. સામાજિક અંતરના ધોરણ પણ જાળવવામાં આવતા નથી, જેના કારણે બેન્કના અધિકારીઓ ચિંતામાં જોવા મળ્યા હતા.
આરોગ્ય પ્રધાન ઇટાલા રાજેન્ડેરે ગુરુવારે લોકોને અપીલ કરી હતી કે, તેઓ પૈસા ઉપાડવા માટે આપેલી તારીખ અને સમય પર બેન્કની મુલાકાત લે.
