બિહાર: બિહાર વિધાનસભામાં વિરોધ પક્ષ નેતા તેજસ્વી યાદવે બિહાર કોરોના મહામારીનું વૈશ્વિક હોટસ્પોટ બનશે તેવી આશંકા વ્યક્ત કરી છે. તેમણે જણાવ્યું છે કે બિહારની પરિસ્થતિ ચીનના વુહાન શહેર કરતા પણ ખતરનાક થઇ શકે છે.
તેજસ્વી યાદવ બિહારના મધુબનીના પૂરગ્રસ્ત વિસ્તારોની મુલાકાત કરતી વખતે થોડો સમય દરભંગામાં રોકાયા હતા જ્યાં તેમણે કોરોના થી અવસાન પામેલા રાષ્ટ્રીય જનતા દળના નેતા જમાલ અખ્તર રૂમીના પરિજનો સાથે પણ મુલાકાત કરી હતી જે દરમિયાન પૂરના પગલે રસ્તા પર શરણ લઇ રહેલા અસરગ્રસ્તોને તેમણે ભોજન વિતરણ કર્યુ હતું.
તેજસ્વી યાદવે જણાવ્યું હતું કે સરકાર પૂરપીડિતો માટે કોઈ પ્રકારની સહાયની જોગવાઇ નથી કરી રહી. પૂરથી બચવા માટે લોકો રસ્તા પર આશરો લઇ રહ્યા છે પરંતુ ભોજનની વ્યવસ્થા ના અભાવે કલાકો સુધી તેઓ ભૂખ્યા તરસ્યા ટળવળી રહ્યા છે. ઉપરાંત રાજ્યમાં કોરોનાથી પણ અનેક લોકો મરી રહ્યા છે. કેટલાય પ્રધાનો, ડોક્ટરો, પોલીસ અધિકારીઓ સતત કોરોનાથી સંક્રમિત થઇ રહ્યા છે પરંતુ સરકારના પેટનું પાણી પણ હલતું નથી.
બિહારમાં કોરોના સંક્રમણ અટકાવવા માટે જરૂરી પગલા ન લેવાયા તો એ દિવસ દૂર નથી જ્યારે બિહાર પણ કોરોનાનું હોટસ્પોટ બની જશે અને ચીનના વુહાનથી પણ ભયંકર પરિસ્થિતિમાં તે આવી જશે.
