નવી દિલ્હી:દેશભરમાં ઑનલાઇન વર્ગો માટેની ફી અને શાળાની ફીમાં વધારો કરવાનો મામલો આજે સુપ્રીમ કોર્ટમાં પહોંચ્યો હતો પરંતુ સુપ્રિમ કોર્ટે આ કેસમાં દખલ કરવાનો ઇનકાર કર્યો હતો. સુપ્રીમ કોર્ટે અરજદારોને સંબંધિત હાઈકોર્ટમાં જવા કહ્યું હતું. સુપ્રીમ કોર્ટે ટિપ્પણી કરી હતી કે દરેક રાજ્યમાં જુદી જુદી સમસ્યાઓ હોય છે. જો તમે સુપ્રીમ કોર્ટમાં આખા દેશની સમસ્યાઓને પડકારશો તો આપણે કેવી રીતે સમગ્ર રાજ્યની સમસ્યાનું નિરાકરણ લાવીશું.
મુખ્ય ન્યાયાધીશ શરદ અરવિંદ બોબડેએ કહ્યું કે અમને ખબર નથી કે કોણ તમામ રાજ્યોની સમસ્યા પર ઓર્ડર જાહેર કરશે. અરજદારે કહ્યું કે પંજાબ અને હરિયાણા હાઇકોર્ટે સ્કૂલના ઑનલાઇન વર્ગો માટેની ફીનો આદેશ આપ્યો છે. આ અંગે કોર્ટે કહ્યું કે હાઇકોર્ટના નિર્ણયને સુપ્રીમ કોર્ટમાં પડકારવામાં આવી શકે છે.
ઉત્તરાખંડ રાજ્યની ફી વધારવાના મામલે સુનાવણી કરતી વખતે સુપ્રીમ કોર્ટે આ ટિપ્પણી કરી હતી. લોકડાઉન દરમિયાન ખાનગી શાળાઓમાં ફી વસૂલવાના કિસ્સામાં આઠ રાજ્યોના પેરેન્ટ્સ એસોસિએશને સુપ્રીમ કોર્ટમાં અરજી કરી હતી. અરજીમાં આ મનમાની પર અંકુશ લાવવા અને વ્યવ્સથા જાળવવા વિનંતી કરવામાં આવી હતી.
અરજીમાં કહેવામાં આવ્યું છે કે શાળાઓ ઑનલાઇન વર્ગના નામે પૂર્ણ ફી વસૂલતી હોય છે, આ તદ્દન અન્યાયી છે. આટલું જ નહીં, ઘણી શાળાઓ ઑનલાઇન વર્ગો માટે વધારાની ફી વસૂલતી હોય છે.
