નવી દિલ્હી: સુપ્રીમ કોર્ટે પરપ્રાંતિય મજૂરોના કેસમાં સુનાવણી શરૂ કરી દીધી છે. સુનાવણી દરમિયાન સોલિસિટર જનરલ તુષાર મહેતાએ કોર્ટને જણાવ્યું હતું કે ભારતીય રેલવેએ 3 જૂન સુધી 4228 ટ્રેનોનું સંચાલન કર્યું છે. હાલમાં કોર્ટે નિર્ણય મંગળવાર સુધી અનામત રાખ્યો છે.
એક અરજીની સુનાવણી કરતાં સુપ્રીમ કોર્ટે ખાનગી ચેરિટેબલ હોસ્પિટલોને પૂછ્યું કે, જેને નજીવા દરે જમીન મળી છે, તેઓ કોરોના દર્દીઓને નિ:શુલ્ક સારવાર આપી શકે છે અને તેઓ કોવિડ 19 દર્દીઓની સરકાર દ્વારા નક્કી કરેલા ભાવ કરતા ઓછામાં સારવાર કરી શકે છે.
સોલિસિટર જનરલ તુષાર મહેતાએ સુપ્રીમ કોર્ટને જણાવ્યું હતું કે 'મેં કેન્દ્ર દ્વારા ખોરાકના વિતરણ માટે કયા પગલા લેવામાં આવી રહ્યા છે તેની માહિતી આપતું સોગંદનામું દાખલ કર્યું છે. આ દરમિયાન, દિલ્હી સરકારનું પ્રતિનિધિત્વ કરતાં એડિશનલ સોલિસિટર જનરલ સંજય જૈને કોર્ટને જણાવ્યું હતું કે હજી પણ લગભગ બે લાખ મજૂરો દિલ્હીમાં છે. તે પાછા જવા માંગતા નથી. તેમણે કહ્યું કે 10,000 થી ઓછા શ્રમિકોએ તેમના મૂળ સ્થળો પર પાછા ફરવાની ઇચ્છા વ્યક્ત કરી છે.
આ ઉપરાંત ઉત્તર પ્રદેશ સરકારનું પ્રતિનિધિત્વ કરતા વરિષ્ઠ એડવોકેટ પી. નરસિંમ્હાએ કોર્ટને જણાવ્યું હતું કે રાજ્યએ કોઈ પણ તબક્કે મજૂરો પર આરોપ લગાવ્યો નથી. તેમણે કોર્ટને જણાવ્યું હતું કે રાજ્યમાં અત્યાર સુધીમાં 1664 મજૂર વિશેષ ટ્રેનો ચલાવવામાં આવી છે અને 21. 69 લાખ લોકોને ઘરે પરત મોકલાયા છે.
તેમણે કહ્યું કે, 5.50 લાખ પરપ્રાંતિય મજૂરોને લેવા માટે દિલ્હીથી ઉત્તર પ્રદેશ સુધીની 10,000 બસો દોડાવવામાં આવી હતી.
પૂર્વ સોલિસિટર જનરલ રણજીત કુમાર બિહાર સરકાર વતી હાજર થયા હતા અને કોર્ટને કહ્યું હતું કે લગભગ 28 લાખ લોકો બિહાર પાછા ફર્યા છે. તેમણે કહ્યું કે બિહાર સરકાર તેમને રોજગાર આપવા તમામ પગલાં લઈ રહી છે.
સુપ્રીમ કોર્ટે રાજસ્થાનના વકીલ મનીષ સિંધવીને પૂછ્યું કે અમે જાણવા માંગીએ છીએ કે કેટલા વધુ પરપ્રાંતીય મજૂરોરો તેમના ઘરે જવા માંગે છે, તો સિંધવીએ જવાબ આપ્યો કે ઘણા લોકો પાછા જવા માંગતા નથી. કૃપા કરીને દરેકને મોકલવા માટે 15 દિવસનો સમય આપો.
કોર્ટે કહ્યું કે અમે 15 દિવસનો સમય આપીએ છીએ જેથી રાજ્ય પરિવહનનું સંપૂર્ણ સંચાલન કરી શકે. આ પછી કોર્ટે તમામ રાજ્યોને મજૂરો માટે રોજગારીનું સર્જન કરવા જણાવ્યું હતું.
