નવી દિલ્હીઃ વડાપ્રધાન નરેન્દ્ર મોદીએ વીડિયો કોન્ફરન્સના માધ્યમથી રાજ્યોના મુખ્યપ્રધાનો સાથે વાતચીત કરી હતી. જેમાં અર્થવ્યવસ્થાને પાટા પર લઇ આવવા અને કોવિડ-19ની સામે લડવા રેડ, ઓરેન્જ અને ગ્રીન ઝોન પર ભાર આપવાની વાત કરી હતી.
આ બેઠક લાંબા સમય સુધી ચાલી હતી. બેઠક દરમિયાન મુખ્યપ્રધાન મમતા બેનર્જીએ કેન્દ્ર સરકાર પર આક્ષેપ કર્યો હતો. તો બીજી બાજુ તમિલનાડુના મુખ્યપ્રધાન કે.પલાનીસ્વામીએ વડાપ્રધાનને અપીલ કરી છે કે તેમના રાજ્યમાં 31 મે સુધી કોઈ પણ ટ્રેન કે ઉ઼ડાન સેવા શરૂ ન કરવામાં આવે.
PM મોદીએ કરી રાજય સરકારોના પ્રયાસની સરાહના
બેઠક દરમિયાન વડાપ્રધાન નરેન્દ્ર મોદીએ તમામની સરાહના કરી હતી. તેમણે કહ્યું કે 'કોરોના મહામારી સામે લડવા અને તેને નિયંત્રણમાં લઇ આવવા ભારતની સફળતાને વૈશ્વિક માન્યતા મળી છે. ભારત સરકાર આ સબંધિત બધી રાજય સરકારો દ્વારા કરવામાં આવેલા પ્રયાસો અને કામગીરીની સરાહના કરે છે.' આ સાથે તેમણે કહ્યું હતું કે આપણે એ સુનિશ્ચિત કરવું જોઈએ કે ગ્રામીણ ભારત આ સંકટથી મુક્ત રહે.
છત્તીસગઢના મુખ્યપ્રધાન ભુપેશ બધેલ
મુખ્યપ્રધાન ભુપેશ બધેલે કહ્યું કે, રાજ્યમાં ગતિવિધિઓના સંચાલનના નિર્ણયનો અધિકાર રાજય સરકારને આપવામાં આવે. કોરોના સંક્રમણને લઈ રેડ ઝોન, ઓરેન્જ ઝોન અને ગ્રીન ઝોન નક્કી કરવાનું દાયિત્વ રાજય સરકારને આપવું જોઈએ. આ સાથે તેમણે ઉમેર્યુ કે રાજ્યમાં પરિવહન સેવા શરૂ કરવાનો નિર્ણય રાજ્ય સરકાર સાથે ચર્ચા વિચારણા કરી લેવો જોઈએ.
તેલંગાણાના મુખ્યપ્રધાન કે. ચન્દ્રશેખર રાવ
તેલંગાણાના મુખ્યપ્રધાને વડાપ્રધાનને અપીલ કરી છે કે યાત્રી ટ્રેન સેવા અત્યારથી શરૂ ન કરવામાં આવે.
પંજાબના મુખ્યપ્રધાન કેપ્ટન અમરિંદર સિંહ
આ વચ્ચે પંજાબના મુખ્યપ્રધાને લોકડાઉનની અવધી વધારવા માટે નરેન્દ્ર મોદીને અપીલ કરી છે.
તમિલનાડુના મુખ્યપ્રધાન કે. પલાનીસ્વામી
બેઠક દરમિયાન મુખ્યપ્રધાને અનુરોધ કર્યો છે કે 31 મે સુધી નિયમિત હવાઈ સેવા કે ટ્રેન સેવા શરૂ ન થવી જોઈએ. આ સાથે તેમણે કહ્યું કે ચેન્નઈમાં કોરોના પોઝિટિવ કેસની સંખ્યામાં વધારો થઈ રહ્યો છે. જેથી પરિવહન સેવા 31 મે સુધી બંધ રાખવી જોઈએ.
પશ્ચિમ બંગાળના મુખ્યપ્રધાન મમતા બેનર્જી
મુખ્યપ્રધાને કેન્દ્ર સરકાર પર આક્ષેપ કરતાં કહ્યું કે 'સરકાર પટકથા તૈયાર કરી રહી છે. હાલ રાજનીતિ કરવાનો સમય નથી, સંઘીય ઢાંચાને તોડવું એ યોગ્ય નથી.'
ઉલ્લેખનિય છે કે દેશમાં 25 માર્ચથી લાદેલા લોકડાઉન બાદ બે વાર તેની અવધીમાં વધારો કરવામાં આવ્યો છે, લોકડાઉનનો આજે 54મો દિવસ છે.
તે દરમિયાન કોરોના વાઈરસના પ્રકોપને અટકાવવા અને તેના પર કાબુ મેળવવા વડાપ્રધાન મુખ્યપ્રધાનો સાથે બેઠક કરી રહ્યાં છે. કોરોના વાઈરસ અંગે ચર્ચા વિચારણા કર્યા અંગેની વડાપ્રધાન મોદીની આ મુખ્યપ્રધાનો સાથેની પાંચમી બેઠક હતી.
