યુનિક આઈડેન્ટિફિકેશન ઓથોરિટી ઓફ ઈન્ડિયાના અધિકારીના જણાવ્યા પ્રમાણે, ભારતીય પાસપોર્ટ ધરાવતા NRIઓ તેમના આગમનની સાથે જ બાયોમેટ્રિક આઈ.ડી એટલે કે, આધારકાર્ડ માટે અરજી કરી શકશે. એનઆરઆઈએ પહેલા આ માટે જો અરજી કરવી હોય તો 182 દિવસની ફરજીયાતપણે રાહ જોવી પડતી હતી.
આ માટે જાહેર કરેલા પરિપત્રમાં ઉલ્લેખ છે કે, જો NRIના પાસપોર્ટમાં ભારતીય સરનામું ન હોય તો યુઆઈડીએઆઈ દ્વારા માન્યતા પ્રાપ્ત કોઈ પણ સરકારી દસ્તાવેજ અથવા ફોટો આઈડી રજૂ કરવું પડશે. તો જ તેમની અરજીનો સ્વિકાર થશે. તેમજ પાસપોર્ટ, રહેઠાણનો પુરાવો અથવા જન્મના દસ્તાવેજ આધારકાર્ડ બનાવવા માટે યોગ્ય ગણાશે.
નોંધનીય છે કે, 5 જુલાઈના રોજ નાણાંપ્રધાન નિર્મલા સીતારમણે તેમના બજેટ ભાષાણમાં આ નિયમ લાગુ કરવાનો સંકેત આપ્યો હતો. ભારતના પાસપોર્ટ સાથે બિન નિવાસી ભારતીયોને ભારત આવ્યા બાદ આધારકાર્ડ બનાવવા માટે રાહ ન જોવી પડે તે અંગે વિચારણા કરવાનો પ્રસ્તાવ તેમણે મુક્યો હતો.
