JNUમાં ફી વધારાને લઈ વિદ્યાર્થીઓની સંસદ માર્ચ, સંસદ ભવનની આજુબાજુમાં કલમ 144 લાગૂ

નવી દિલ્હી: જવાહરલાલ નેહરૂ યુનિવર્સિટીમાં હોસ્ટલ મેનુઅલ તથા વધારે ફીના કારણે વિદ્યાર્થીઓ દ્વારા પ્રદર્શન કરવામાં આવી રહ્યું છે. જેમાં વિદ્યાર્થીઓ સંસદ સુધી પગપાળા પ્રદર્શન માર્ચ કરી રહ્યા છે. વિદ્યાર્થી સંઘની પ્રસ્તાવિત માર્ચ સવારે 10 વાગ્યે શરૂ થઈ છે. પ્રદર્શનકારીઓને રોકવા માટે પોલીસે સુરક્ષાની કડક વ્યવસ્થા પણ કરી છે. જેને લઈ સંસદ ભવનની આજુબાજુમાં કલમ 144 લાગૂ કરી દીધી છે.

વિદ્યાર્થીઓને સમર્થન આપવામાં માટે દિલ્હી વિશ્વવિદ્યાલય અને જામિયા મિલિયા ઇસ્લામિક સહિત અનેક વિશ્વવિદ્યાલયના વિદ્યાર્થીઓ સંસદ પહોંચ્યા છે.તો બીજી તરફ યૂનિવર્સિટી વહિવટીતંત્રએ વિદ્યાર્થીને ક્લાસમાં પરત ફરવાની અપીલ કરી છે. આજથી સંસદનું શિયાળુ સત્ર પણ શરૂ થયું છે.

ફી વધારાને લઇને કરવામાં આવેલા મોટા પ્રદર્શન બાદ, જવાહરલાલ નહેરુ યુનિવર્સિટીના વિદ્યાર્થીઓ યુનિવર્સિટીના વહિવટીતંત્ર વિરૂદ્ધ પોતાના પ્રદર્શનને અને વધુ વેગ આપ્યો છે, આ પહેલા વિદ્યાર્થીઓને એડમિન બ્લોક પરિસરમાં નારા લખી દીધા અને સ્વામી વિવેકાનંદની પ્રતિમા અને તેની આસપાસ પણ એવું જ કર્યું છે, હજુ પ્રતિમાનું અનાવરણ થયું નથી.
વિદ્યાર્થીઓ હોસ્ટલના મેનુઅલ તથા અમુક નિયમોને લઇ અસંતુષ્ટ છે તથા ફિ વધારાને લઇ પ્રદર્શન કરી રહ્યા છે.