નવી દિલ્હી: કોરોના વાઈરસના રોગચાળાને રોકવા માટે લોકડાઉન વચ્ચે રવિવારે બિન-આવશ્યક ચીજવસ્તુઓની વેચવાની ઈ-કોમર્સ કંપનીઓની આશાને જોરદાર ઝટકો લાગ્યો છે. સરકારે સ્પષ્ટતા કરી છે કે, હવે બિનજરૂરી ચીજોનું વેચાણ લોકડાઉન સમાપ્ત થયા પછી જ થઈ શકે છે. આ અગાઉ કેન્દ્ર સરકારે 20 એપ્રિલથી ઈ-કોમર્સ કંપનીઓને બિન-આવશ્યક ચીજોના વેચાણ માટે મંજૂરી આપી હતી.
હવે તેમાં સુધારો કરીને તેમને ફક્ત ખોરાક, ફાર્માસ્યુટિકલ અને તબીબી ઉપકરણો જેવા આવશ્યક ચીજવસ્તુઓ પહોંચાડવાની મંજૂરી આપવામાં આવી છે. ઈ-કોમર્સ કંપનીઓના ડિલિવરી વાહનોને રસ્તા પર ચાલવા માટે અધિકારીઓની પરવાનગી લેવી ફરજિયાત છે
કેન્દ્રીય ગૃહમંત્રાલયે રવિવારે ટ્વીટ કર્યું હતું કે, લોકડાઉન દરમિયાન ઈ-કોમર્સ કંપનીઓ દ્વારા બિન-જરૂરી ચીજોના વેચાણ પરનો પ્રતિબંધ ચાલુ રહેશે. રાજ્ય અને કેન્દ્રશાસિત પ્રદેશોને જારી કરાયેલા નવા આદેશમાં સરકારે સ્પષ્ટ કર્યું છે કે, ઈ-કોમર્સ કંપનીઓ અને તેમના વાહનોનો ઉપયોગ ફક્ત જરૂરી ચીજોની ડિલિવરી માટે જ કરી શકશે. આ સમયગાળા દરમિયાન કોઈપણ બિન-જરૂરી ચીજોના ડિલિવરી પર પ્રતિબંધ યથાવત રહેશે.
