નવી દિલ્હી: BharatPeના સહ-સ્થાપક અશ્નીર ગ્રોવરે BharatPe વિશેની તેમની સોશિયલ મીડિયા પોસ્ટ માટે માફી માંગી છે. મંગળવારે અશ્નીર ગ્રોવરે દિલ્હી હાઈકોર્ટ સમક્ષ આ અંગે માફી માંગી હતી. જો કે, હાઈકોર્ટે અશ્નીર પર 2 લાખ રૂપિયાનો દંડ ફટકાર્યો હતો કે તેણે કોર્ટના અગાઉના આદેશોનું ઉલ્લંઘન કર્યું છે અને તેનું વર્તન સંતોષકારક નથી.
કંપની વિરુદ્ધ અપમાનજનક ભાષાનો ઉપયોગ: વાસ્તવમાં, મે મહિનામાં હાઈકોર્ટે અશ્નીર ગ્રોવર અને ભારતપેને એક બીજા વિશે કોઈ અસંસદીય અથવા બદનક્ષીભરી ભાષાનો ઉપયોગ ન કરવાનો આદેશ આપ્યો હતો. બાદમાં, BharatPe એ દિલ્હી હાઈકોર્ટમાં એક નવી અરજી દાખલ કરીને કહ્યું કે અશ્નીર ગ્રોવરે કંપની વિરુદ્ધ અપમાનજનક ભાષાનો ઉપયોગ કરીને સોશિયલ મીડિયા પર પોસ્ટ કરી છે. ભારતપે કહ્યું હતું કે અશ્નીર ગ્રોવર એક રીઢો ગુનેગાર છે અને તે કોર્ટના આદેશોનું પાલન કરી રહ્યો નથી.
અશ્નીરના વકીલ ગિરિરાજ સુબ્રમણ્યમનું નિવેદન: સુનાવણી દરમિયાન અશ્નીર ગ્રોવર તરફથી હાજર રહેલા વકીલ ગિરિરાજ સુબ્રમણ્યમે કહ્યું કે, ગ્રોવર કોર્ટ પાસેથી માફી માંગી રહ્યો છે અને આ માટે તેણે એફિડેવિટ દાખલ કરી છે કે તે ભવિષ્યમાં કોર્ટના આદેશનો અનાદર નહીં કરે. ગિરિરાજે કહ્યું કે, અશ્નીર ગ્રોવરે પણ તેની ટ્વીટ હટાવી દીધી છે.
ભારતપેના એડવોકેટ અખિલ સિબ્બલનો આરોપ: સુનાવણી દરમિયાન, ભારતપે તરફથી હાજર રહેલા એડવોકેટ અખિલ સિબ્બલે કહ્યું કે, અશ્નીર ગ્રોવરની ટ્વીટને હટાવવામાં ઘણો વિલંબ થયો હતો અને જ્યાં સુધી ટ્વીટ હટાવી લેવામાં આવી ત્યાં સુધીમાં મીડિયાએ તેના પર સમાચાર પ્રકાશિત કર્યા હતા અને કંપનીને નુકસાન થયું હતું.
અશ્નીર ગ્રોવર અને ભારતપે વચ્ચે 15 કેસ પેન્ડિંગ: કોર્ટે અશ્નીર ગ્રોવરનો માફી પત્ર વાંચ્યો અને જાણવા મળ્યું કે, તેનું વર્તન સંતોષકારક નથી. જે બાદ કોર્ટે અશ્નીર ગ્રોવરની માફી સ્વીકારી લીધી અને 2 લાખ રૂપિયાનો દંડ પણ ફટકાર્યો. તમને જણાવી દઈએ કે અશ્નીર ગ્રોવર અને ભારતપે વચ્ચે લગભગ 15 કેસ દિલ્હી હાઈકોર્ટમાં પેન્ડિંગ છે.
આ પણ વાંચો:
