સુરતઃ શહેરના કોઝવે ભાભી નદીમાં એક યુવકનો મૃતદેહ મળી આવવાની ફરિયાદ ચોક બજાર કોઝવે પોલીસ મથકમાં નોંધાઈ છે. સુરતમાં છેલ્લા 3 દિવસમાં હત્યાનો 5મો બનાવ નોંધાયો છે. માત્ર 72 કલાકમાં હત્યાના 5 બનાવની ફરિયાદ નોંધાતા સમગ્ર પંથકમાં ચકચાર મચી ગઈ છે.
5મો બનાવઃ ચોક બજાર કોઝવે પોલીસ મથકમાં નોંધાયો છે. જેમાં યુવકના ગળાના ભાગે ઈજાના નિશાન મળી આવ્યા છે. અજાણ્યા મૃતક યુવાનની ઉંમર આશરે 30થી 35 વર્ષની જણાઈ રહી છે. મૃતકની ઓળખ થાય તે દિશામાં પોલીસે તપાસ શરૂ કરી છે. પોલીસ મૃતદેહ પોસ્ટમોર્ટમ માટે મોકલી આપ્યો છે. સુરતમાં વધુ 1 યુવકની હત્યાનો બનાવ સામે આવતા ચકચાર મચી જવા પામી છે.
છેલ્લા 3 દિવસમાં 5 હત્યાઃ સુરત શહેરમાં છેલ્લા 3 દિવસમાં હત્યાના 5 બનાવથી શહેરમાં કાયદાને વ્યવસ્થા સંદર્ભે પ્રશ્નો ઊભા થઈ રહ્યા છે. તાપી નદી કોઝવે નજીક એક યુવકની લાશ મળી આવી છે. જ્યારે અગાઉ મહિધરપુરા પોલીસ મથકની હદમાં આવતા સુમુલ ડેરી રોડ રેલવે પાર્સલ ઓફિસ પાસે મોડી રાતે એક રીક્ષા ચાલકની હત્યા કરવામાં આવી હતી. મૃતકનું નામ શેરુ યાદવ હોવાનું સામે આવ્યું છે. વરાછામાં પ્રેમિકાને મળવા જતા પ્રેમીને માર મારતા તેનું મોત થયું હતું તે બનાવમાં પોલીસે 3 આરોપીઓની ધરપકડ કરી હતી. ખટોદરા અને લીંબાયત વિસ્તારમાં પણ યુવકની હત્યાનો બનાવ સામે આવી ચુક્યો છે.
આ સમગ્ર મામલે ચોક બજાર પોલીસ મથકના ઈન્સ્પેક્ટર વિશાલ વાઘડિયાએ જણાવ્યું હતું કે, અમને 1 અજાણી લાશ અંગે કંટ્રોલરૂમમાંથી જાણ કરવામાં આવી હતી. આ મૃતક યુવકની ઉંમર આશરે 30થી 35 વર્ષ છે. તેના ગળાના ભાગે ઈજાના નિશાન પણ મળી આવ્યા છે. યુવક કોણ છે તે અંગે અમે તપાસ કરી રહ્યા છે.
