જૂનાગઢ: 16મી ઓક્ટોબરથી સાસણ ખાતે સિંહ દર્શન સહિત દેવળીયા, આંબરડી, ગિરનાર અને થોડા જ દિવસો પૂર્વે બરડામાં જંગલ સફારીની શરૂઆત થઈ છે. ત્યારે મોટાભાગના સફારી પાર્કમાં ઓનલાઇન બુકિંગની વ્યવસ્થા અમલી બનાવવામાં આવી છે. જેને ધ્યાને રાખીને કેટલાક છેતરપિંડી કરતા ઈશમો દ્વારા નકલી વેબસાઈટ બનાવીને ગ્રાહકોને છેતરવાના પ્રયાસો પણ કરાઈ રહ્યા છે. પાછલા વર્ષો દરમિયાન આવા કેટલાક કિસ્સાઓ સામે આવ્યા છે. ત્યારે વનવિભાગે સિંહ દર્શન માટે આવતા પ્રવાસીઓએ ઓનલાઈન બુકિંગ વખતે તકેદારી રાખવાની સૂચના અને દિશા નિર્દેશો પણ જાહેર કર્યા છે.
સિંહ દર્શન માટે આવો છો તો ઓનલાઇન બુકિંગમાં રાખજો તકેદારી
16 મી ઓક્ટોબરથી સાસણ સહિત દેવળીયા, આંબરડી, ગિરનાર અને તાજેતરમાં જ શરૂ થયેલી બરડા નેચર સફારી માટે સિંહ દર્શન અને પ્રાકૃતિક સફારી માટે જે પ્રવાસીઓ આવી રહ્યા છે તેના માટે વન વિભાગે ઓનલાઈન બુકિંગ વ્યવસ્થા શરૂ કરી છે. બરડા નેચર સફારી માટે ટિકિટ સ્થળ પરથી જ આપવામાં આવે છે. આવી પરિસ્થિતિમાં સિંહ દર્શન અને જંગલમાં સફારી માટે આવતા પ્રવાસીઓને છેતરવા માટે કેટલાક ઈસમો સિંહ દર્શનની સિઝન શરૂ થાય ત્યારે હરકતમાં આવતા હોય છે. આવા છેતરપિંડી કરતા લોકો દ્વારા સિંહ દર્શનને લગતી એકદમ ભળતી વેબસાઈટ બતાવીને તેમાં પર્યટકોનું ઓનલાઇન બુકિંગ કરતા હોય છે. જે સાસણ કે અન્ય સફારી પાર્ક પહોંચતા જ તેમના પ્રવાસીઓ દ્વારા કરેલું બુકિંગ કોઈ ખોટી કે છેતરામણી વેબસાઈટમાં કર્યું હોવાનો અહેસાસ થાય છે. પાછલા વર્ષો દરમિયાન આ જ પ્રકારના કેટલાક કિસ્સાઓ સામે આવ્યા હતા ત્યારે સાસણ સહિત વન્ય જીવ અને નેચર સફારીની મુલાકાતે આવતા પ્રવાસીઓ માટે ભાગે ઓનલાઇન બુકિંગ કરતાં પૂર્વે ખાસ તકેદારી રાખવાની સૂચના પણ પ્રત્યેક પ્રવાસીને આપવા આવી રહી છે.
પ્રવાસીઓને છેતરવા લેભાગુ તત્વો સક્રિય
સાસણ સહિત ગીર વિસ્તારમાં આવેલા અભયારણ્યોમાં સિંહ દર્શનની સાથે પ્રાકૃતિક સફારી માટે પણ દેશ અને દુનિયાના પ્રવાસીઓ ખૂબ જ ઉત્સુક બનતા હોય છે. પ્રવાસીઓની આવી ઉત્સુકતાને ધ્યાને રાખીને કેટલાકને લેભાગુ તત્વો દ્વારા બોગસ વેબસાઈટ બનાવીને તેમાં સફારી અને અન્ય પ્રકારનું બુકિંગ કરતા હોય છે. જેના પૈસા પણ તેઓ ઓનલાઇન મેળવી લેતા હોય છે. આવી પરિસ્થિતિમાં વન વિભાગની એકમાત્ર આધિકારીક વેબસાઈટ https://girlion.gujarat.gov.in છે. આ વેબસાઈટ પર કોઈપણ પ્રવાસી ગીરમાં આવેલા સફારી પાર્કની પરમિટ મેળવી શકે છે. આ સિવાયની અન્ય વેબસાઈટ લેભાગુ તત્વો દ્વારા બોગસ ઊભી કરવામાં આવી છે.
કેવી રીતે ખબર પડે વેબસાઈટ સાચી છે કે નકલી?
સરકારી વેબસાઈટની બીજી એક ઓળખ gujarat.gov.in પણ છે. આ પ્રકારનું એક્સટેન્શન માત્રને માત્ર સરકારી વેબસાઈટને જ મળે છે. જેથી તેની ઓનલાઈન ઓળખ કરવી પણ ખૂબ સરળ બને છે. તેમ છતાં કેટલાક પ્રવાસીઓ બોગસ અને લેભાગુ તત્વો દ્વારા બનાવવામાં આવેલી વેબસાઈટ પર બુકિંગ કરીને પોતાના નાણાં ગુમાવતા હોય છે. ત્યારે વેકેશનના આ સમયમાં સાસણ વન વિભાગના નાયબ વન સંરક્ષક મોહન રામે તમામ પ્રવાસીઓને તકેદારી રાખવા અને એકમાત્ર સરકારી વેબસાઈટ પર જ તમામ સફારી પાર્કના બુકિંગ કરે તેવી તકેદારી રાખવા સાથેની સૂચનાઓ પણ પ્રવાસીઓના હિતમાં જાહેર કરી છે.
આ પણ વાંચો:
