અંબાજી: આજે ગુરુપૂર્ણિમાના પવિત્ર દિવસે અંબાજી મંદિરના ચાચર ચોકમાં જ માતાજીની ગાદીના પર બેસતા ગાદીપતિ ભટ્ટજી મહારાજ ભરતભાઈ પાદ્યાનુ ભક્તો દ્વારા પૂજન કરવામાં આવ્યું હતું. અને ગાદીપતિ ભરતભાઈ પાદ્યાને કુમકુમ, તિલક અને ફૂલમાળા પહેરાવી ગુરુના આશીર્વાદ મેળવી ધન્યતા અનુભવી હતી.
ભક્તોની ભીડ ઉમટી: અંબાજી દેશનાં 51 શક્તિપીઠમાંથી માઁ આધ્યશક્તિ પીઠ તરીકે ઓળખાય છે. અંબાજી મંદિર ઉપર 358 નાના મોટા સુવર્ણ કળશ લાગેલા હોવાથી આ તીર્થને ગોલ્ડન ટેમ્પલ તરીકે પણ ઓળખવામાં આવે છે. અંબાજી ખાતે ભક્તો રવિવાર આઠમ અને પૂનમે દર્શન કરવા આવતા હોય છે. અંબાજી મંદિરમાં આજે પૂનમે સવારે 6:00 વાગે મંગળા આરતી કરવામાં આવી હતી.જેમાં મોટી સંખ્યામાં ભક્તો આરતીમાં જોડાયા હતા. લાંબી-લાંબી લાઈનો પણ મંદિર પરિસરમાં જોવા મળી હતી. અંબાજી મંદિર ખાતે વહેલી સવારથી જ લાઈન વ્યવસ્થામાં ભક્તો જોડાયા હતા. આરતીમાં ભક્તોએ મા અંબાના મંદિર સમક્ષ આરતી કરી હતી. દર પુનમ ભરવા આવતા ભક્તોએ પણ માતાજીના દર્શન કરીને ધન્યતા અનુભવી હતી.
પૂનમના દિવસે મંદિરને શણગારાયું: અંબાજી મંદિરને પૂનમના દિવસે રંગબેરંગી ફૂલોથી શણગારવામાં આવ્યું હતુ. અંબાજી ખાતે આજે રવિવાર અને પૂનમ હોવાથી ભક્તો વહેલી સવારથી જ દેવ દર્શન કરવા આવ્યા હતા. મંદિરના ચાચર ચોકમાં પણ ભક્તો મોટી સંખ્યામાં જોવા મળ્યા હતા. બોલ મારી અંબે જય જય અંબેનો નાદ પણ શક્તિપીઠમાં સાંભળવા મળ્યો હતો.
