ઓલપાડ: ઓલપાડ પોલીસ મથકના મહિલા પીએસઆઇ એસ.એન ચૌધરી અને તેમની ટીમ પેટ્રોલીંગમાં હતી, તે દરમિયાન ચોક્કસ ખાનગી રાહે બાતમી મળી હતી કે ઓલપાડના પરા વિસ્તારથી ઓલપાડ તરફ આવતા મેઈન રોડ ઉપર સેના ખાડીના બ્રિજ પાસે અલ્તાફ દીવાન નામનો ઇસમ જેણે વાદળી કલરનો શર્ટ અને ભૂરા ક્લરનું પેન્ટ પહેરેલ છે. તે કથ્થઈ કલરના લેધર બેગમાં નકલી ચલણી નોટો લઇને આવી રહ્યો છે. અને ઓલપાડ બજારમાં નકલી નોટો વટાવવાની ફિરાકમાં છે. ત્યારબાદ બાતમીના આધારે પોલીસે વોચ ગોઠવી દીધી હતી.
નકલી નોટો સાથે એક ઇસમ ઝડપાયો: બાતમીના આધારે વોચમાં રહેલ ઓલપાડ પોલીસે બાતમી વર્ણન મુજબનો ઇસમ આવતા જ તેણે દબોચી લીધો હતો. અને તેઓનું નામ ઠામ પૂછતા તેણે પોતાનું નામ અલ્તાફ અહેમદ દીવાન (ઉ.42) હોવાનું જણાવ્યું હતું. તેની પાસે રહેલ બેગ ચેક કરવામાં આવતા બેગમાંથી 100ના દરની 97 નોટો મળી આવી હતી, જે નોટો સાચી છે કે ખોટી એ તપાસ કરવા સાયન્ટીફિક ઓફિસરની મદદ લેવાઇ હતી. જેમાં આ તમામ 97 નોટો નકલી હોવાનું બહાર આવ્યું હતું. પોલીસે નકલી નોટો, મોબાઈલ, બેગ સહિતનો મુદ્દામાલ કબજે કર્યો હતો.
ઝડપાયેલ ઇસમ જાતે નોટો છાપતો: નકલી નોટો સાથે ઝડપાયેલ ઇસમ અલ્તાફ અહેમદ દીવાન જાતે નોટો છાપતો હોવાનું હાલ પોલીસની પ્રાથમિક તપાસમાં બહાર આવ્યું છે. આરોપી નકલી નોટો છાપવાનું મટીરીયલ ક્યાંથી લાવ્યો, કેટલી નકલી નોટો અત્યાર સુધીમાં માર્કેટમાં આપી, અન્ય કેટલા ઈસમો સંડોવાયેલા છે, અગાઉ કોઈ ગુનાના શામેલ છે કે નહિ. એ દિશામાં તપાસ હાથ ધરી છે.
