ભાવનગરઃ શહેર અને જિલ્લામાં પોલીસ દ્વારા વારંવાર દારૂના જથ્થા ઝડપવામાં આવે છે, ત્યારે ભાવનગરની એલસીબી પોલીસ પેટ્રોલિંગમાં હતી એ દરમિયાન મળેલી બાતમીને આધારે મસમોટો દારૂનો જથ્થો ઝડપી લેવામાં સફળતા મેળવી છે, છ લાખથી વધુ કિંમતનો દારૂનો જથ્થો ઝડપી બે શખ્સો સાથે વરતેજ પોલીસ સ્ટેશનમાં આ ફરિયાદ પણ નોંધાવી છે.
LCB પોલીસે બાતમીને પગલે સગેવગે કરતા સમયે રેડ
ભાવનગર એલસીબી પોલીસે મળેલી બાતમીને આધારે શહેરના વરતેજ પોલીસ સ્ટેશન વિસ્તારના વિશ્વકર્મા જીઆઇડીસીમાં રેડ કરી હતી. વિશ્વકર્મા જીઆઇડીસીમાં રાજ શક્તિ રોડ લાઇન્સની પાછળ અવાવરું જગ્યામાં દારૂને સગેવગે કરવામાં આવતો હોવાની બાતમી મળી હતી. બાતમીને પગલેે રેડ કરતા પોલીસને મોટો દારૂનો જથ્થો હાથ લાગી ગયો હતો. જો કે સ્થળ ઉપરથી બે શખ્સોની પણ ધરપકડ કરવામાં આવી હતી. આમ પોલીસની લાખ રૂપિયાની દારૂની રેડ સફળ રહી હતી.
દારૂની બોટલો અને કુલ કિંમત લાખોમાં
ભાવનગર શહેરના વિશ્વકર્મા જીઆઇડીસીમાંથી એલસીબી પોલીસે કુલ 1764 જેટલી દારૂની બોટલ ઝડપી પાડી છે, ત્યારે કુલ દારૂની કિંમત 6,85,340 થાય છે. LCB પોલીસે રોયલ ચેલેન્જ ફાઈનેસ્ટ 750 ml, 512 બોટલ, 2,66,240 કિંમત, ત્યારબાદ બેગપાઈપર 750 ml 687 બોટલ, 2,06,100 કિંમત અને મેકડોવેલ 750ml 568 બોટલ ,2,13,000 કિંમતની ઝડપી લીધી છે. જો કે પોલીસે બે મોબાઈલ ગણીને કુલ 6,93,340 નો મુદ્દામાલ ઝડપી લીધો છે.
વરતેજ પોલીસ સ્ટેશનમાં નોંધાયો ગુનો
ભાવનગર એલસીબી પોલીસે 1764 બોટલ સાથે બે શખ્સોને ઝડપી લીધા હતા. જેમાં નરેશ સનાભાઇ બારૈયા ભાવનગરનો રહેવાસી અને અમજદ દિલાવરખાન પઠાણ સાવરકુંડલાના રહેવાસી નામના બે શખ્સોને ઝડપીને સમગ્ર મુદ્દામાલ સાથે વરતેજ પોલીસ સ્ટેશનમાં ધોરણસર ગુનો નોંધીને આગળની તપાસ સોંપી હતી.
