વાપી: છેલ્લા એક અઠવાડિયાથી વાપી નગરપાલિકાને મહાનગરપાલિકા ઘોષિત કરવાની લોકો રાહ જોઈ રહ્યા હતા. ત્યારે બુધવારે કેબિનેટ બેઠકમાં મળેલી મંજૂરી બાદ વાપી નગરપાલિકાને ઓફિશિયલી મહાનગરપાલિકા જાહેર કરવાની જાહેરાત થતા જ અનેક લોકોએ તેને આવકાર આપ્યો છે. જ્યારે પાલિકાના સમાવવામાં આવનારા 11 ગામના લોકોએ તેનો વિરોધ દર્શાવ્યો છે.
11 ગામોના લોકોમાં મહાનગરપાલિકામાં સમાવવા સામે વિરોધ
11 ગામોમાં મહાનગરપાલિકામાં સમાવવા સામે અગાઉથી જ વિરોધ હતો તો, વાપીને મહાનગરપાલિકાની જાહેરાત થતાની સાથે જ મોડી રાત્રે મોરાઈ ગ્રામ પંચાયતમાં 2000 વધુ લોકોનું ટોળું ગ્રામ પંચાયતની બહાર વિરોધ કરતા આખી રાત બેસી રહ્યું હતું. લોકોએ જણાવ્યું કે, 'જીવ જશે તો વાંધો નથી, પરંતુ મહાનગરપાલિકામાં અમારું ગામ અમે સમાવા નહીં દઈએ વિરોધ ચાલુ રાખીશું.'
નગરપાલિકાના વિપક્ષના સભ્યોએ જાહેરાતને આવકાર આપ્યો
વાપી મહાનગરપાલિકાની જાહેરાત થતા જ કહી ખુશી કહી ગમનો માહોલ છે. ત્યારે નગરપાલિકાના વિપક્ષના સભ્યો ખાસ કરીને કોંગ્રેસી સભ્યો દ્વારા ઉપરોક્ત જાહેરાતને આવકાર આપવામાં આવ્યો છે. વિપક્ષના સભ્ય ખંડુભાઈ પટેલના જણાવ્યા અનુસાર અગાઉ, નગરપાલિકામાં જ્યાં ઓછી ગ્રાન્ટ અને ઓછું ફંડ આવતું હતું જેને લઇને અનેક વિકાસના કામો રૂંધાઈ રહ્યા હતા. જે હવે મહાનગરપાલિકા બનતા સાથે દરેક વિસ્તારમાં પ્રાથમિક જરૂરિયાતોનો સર્વાંગી વિકાસ થશે.
નોટિફાઇડ એરિયાને મહાનગરપાલિકામાં સમાવવા અંગે લોકોની માંગ
વાપી GIDCમાં આવેલા નોટિફાઇડ વિસ્તારને વાપી મહાનગરપાલિકામાં સમાવવામાં આવે એવી સ્થાનિક લોકોમાં માંગ ઉઠી છે. કારણ કે વાપીના ડુંગરા ચણોદ છીરી અને છરવાડા જેવા ગામોની બોર્ડર નોટિફાઇડ વિસ્તારની કેટલાક ક્ષેત્રને અડીને આવેલી છે. જો આ તમામ ગામોને સમાવી લેવામાં આવ્યા હોય તો નોટિફાઇડ વિસ્તારને પણ તેમાં સમાવવામાં આવે એવી લોકોમાં માંગ ઉઠી રહી છે.
આગામી દિવસમાં ગ્રામ પંચાયતના રેકોર્ડ હસ્તગત કરાશે
વાપી મહાનગરપાલિકાની જાહેરાત થતાની સાથે જ હવે સીમાંકનની પ્રક્રિયા હાથ ધરાશે. જે માટે 11 જેટલા ગામોનો મહાનગરપાલિકામાં સમાવેશ કરવામાં આવ્યો છે. એ તમામ ગામોના રેકોર્ડ હસ્તગત કરવામાં આવશે જે માટેની પ્રક્રિયા હાથ ધરવામાં આવી છે. કલેક્ટર દ્વારા જિલ્લા વિકાસ અધિકારીને લેખિતમાં આપવામાં આવ્યું છે કે મહાનગરપાલિકા જાહેરાત થઈ છે ત્યારે 11 જેટલા ગામોના રેકોર્ડ અને દસ્તાવેજો પાલિકાના હસ્તગત કરવાના થાય છે એ માટેની કામગીરી આરંભી દેવા માટે કલેક્ટર દ્વારા હુકમ કરાયો છે.
વિકાસના કામોને વધુ વેગ મળશે
વાપી મહાનગરપાલિકા જાહેર થતાં વાપીના વિકાસના કામો માટે સરકારમાંથી વધુ ગ્રાન્ટ આવશે. પ્રાથમિક જરૂરિયાતો અને વિકાસના કામોને વધુ વેગ મળશે એવું સ્થાનિકો તેમજ હાલના કોર્પોરેટરો જણાવી રહ્યા છે. જો કે સીમાંકન પ્રક્રિયાની કામગીરી હજુ થોડી લાંબી ચાલશે, જેને લઇને હાલમાં વહીવટદાર દ્વારા વહીવટ કરવામાં આવે એવી શક્યતાઓ છે.
વાપી મહાનગરપાલિકાના કમિશનરને નિમણૂક
વાપી મહાનગરપાલિકા જાહેર થતાં ડીજીવીસીએલના મેનેજિંગ ડાયરેક્ટર રહી ચૂકેલા યોગેશભાઈ ચૌધરીની વાપી મહાનગરપાલિકાના પ્રથમ કમિશનર તરીકે નિમણૂક કરવામાં આવી છે. જે માટેની જાહેરાત પણ સરકારમાંથી કરી દેવામાં આવી છે. એટલે કે આગામી દિવસમાં વાપી મહાનગરપાલિકાના કમિશનરનો ચાર્જ યોગેશભાઈ ચૌધરી સંભાળશે. આમ વાપી મહાનગરપાલિકાની જાહેરાત તથા કરી ખુશી કહી ગામનો માહોલ જોવા મળ્યો છે.
આ પણ વાંચો:
