વડતાલઃ ધૂળેટી ઉત્સવને લઈને વડતાલ ખાતે વિદ્યાનગરથી 12 વિદ્યાર્થીઓનું ગ્રુપ આવ્યું હતું. જેમાંથી પાંચ વિદ્યાર્થીઓ ગોમતી તળાવમાં ન્હાવા માટે ઉતર્યા હતા. તે દરમિયાન પગ લપસતા વિદ્યાર્થીઓ ડૂબવા લાગ્યા હતા. ઘટનાને પગલે અન્ય વિદ્યાર્થીઓ તેમજ આજુબાજુના લોકો દ્વારા બે વિદ્યાર્થીઓને બચાવી લેવાયા હતા. જ્યારે ત્રણ વિદ્યાર્થીઓ ઉંડા પાણીમાં ડૂબી જતા તેમના મોત નિપજ્યા હતા. ઘટનાને પગલે વડતાલ પોલિસ તેમજ ફાયર બ્રિગેડની ટીમ પહોંચી હતી. ત્રણ વિદ્યાર્થીઓના મૃતદેહને બહાર કાઢીને કરમસદ હોસ્પિટલમાં પોસ્ટમોર્ટમ માટે મોકલાયા હતાં તેમજ ઘટના મામલે પોલીસે આગળની કાર્યવાહી હાથ ધરી છે.
12 વિદ્યાર્થીઓનું ગ્રુપ આવ્યું હતું ધૂળેટી મનાવવાઃ મળતી વિગતો મુજબ વલ્લભ વિદ્યાનગરની એમ.વી.પટેલ કોલેજના વિદ્યાર્થીઓનું આ ગ્રુપ હતું. જેમાં 12 જેટલા વિદ્યાર્થીઓ હતા. ધુળેટી રમ્યા બાદ વિદ્યાર્થીઓ ગોમતી તળાવમાં ન્હાવા માટે આવ્યા હતા. જે દરમિયાન પગ લપસતા ડૂબી જવાની ઘટના બની હતી. ઘટના બનતા વિદ્યાર્થીઓમાં ભારે ગમગીની ફેલાઈ હતી. આ બાબતે વડતાલ પોલિસ સ્ટેશનના પોલિસ ઈન્સ્પેક્ટર વી.બી.દેસાઈએ જણાવ્યુ હતું કે, વિદ્યાનગરથી વિદ્યાર્થીઓનું ગ્રુપ ધુળેટી મનાવવા આવ્યું હતું.જે ગોમતી તળાવમાં ન્હાવા પડતા ત્રણ વિદ્યાર્થીઓ ડૂબી જતા તેમના મોત નિપજ્યા હતા.
અકસ્માતોની વધતી ઘટના અંગે જાગૃતિનો અભાવઃ મહત્વનું છે કે, જીલ્લામાં વિવિધ પર્વો તેમજ તહેવારો દરમિયાન નદી તળાવોમાં ડૂબી જવાની ઘટનાઓ અવાર નવાર બનતી હોય છે. જેમાં ધૂળેટી પર્વે નહેર, નદી અને તળાવોમાં ન્હાવા જતા ડૂબી જવાના બનાવો બને છે. આ ઉપરાંત ડાકોર પગપાળા આવતા યાત્રીઓ રસ્તામાં આવતા નદી,તળાવોમાં ન્હાવા જતા ડૂબવાના બનાવો બને છે. તેમજ ગળતેશ્વર ખાતે મહીસાગર નદીમાં પણ અવાર-નવાર ડૂબી જવાની કરૂણ ઘટનાઓ બને છે. ત્યારે આવા બનાવો બનતા અટકે તે માટે સ્થાનિકો, તંત્ર અને સેવાભાવી સંસ્થાઓ સાથે મળી જાગૃતિ તેમજ સલામતી માટેની સહિયારી કામગીરી કરે તે અત્યંત જરૂરી બન્યું છે.
