મોસ્કો: રશિયાના પૂર્વ કિનારે 7.0ની તીવ્રતાના ભૂકંપ બાદ શિવલુચ જ્વાળામુખી ફાટ્યો હતો. આ દુર્ઘટનામાં કોઈ જાનહાનિના સમાચાર નથી. જો કે, પર્યાવરણ પર તેની અસરોનું હજુ સુધી મૂલ્યાંકન કરવામાં આવ્યું નથી.
CNNએ રશિયન સરકારી મીડિયાને ટાંકીને આ માહિતી આપી છે. રિપોર્ટ અનુસાર, જ્વાળામુખીની રાખ દરિયાની સપાટીથી લગભગ 8 કિલોમીટર ઉપર પહોંચી ગઈ છે. રિપોર્ટમાં કહેવામાં આવ્યું છે કે જ્વાળામુખી લાવાનો વિશાળ ઢગલો છોડી ગયો છે. કોઈના ઘાયલ થયાના સમાચાર નથી. સિવલુચ જ્વાળામુખી રશિયાના કામચાટકામાં દરિયાકાંઠાના શહેર પેટ્રોપાવલોવસ્ક-કામચત્સ્કીથી લગભગ 280 માઇલ દૂર સ્થિત છે.
તેની વસ્તી આશરે 181,000 છે. યુએસ જીઓલોજિકલ સર્વે (યુએસજીએસ) એ જણાવ્યું હતું કે ભૂકંપનું કેન્દ્ર પેટ્રોપાવલોવસ્ક-કામચત્સ્કીથી લગભગ 55 માઈલ દક્ષિણે અને લગભગ 30 માઈલની ઊંડાઈએ હતું. ભૂકંપના કારણે કોઈ મોટું નુકસાન થયું નથી. જો કે, ઇમારતોને સંભવિત નુકસાન માટે તપાસ કરવામાં આવી રહી છે. સામાજિક સુવિધાઓ પર વિશેષ ધ્યાન આપવામાં આવી રહ્યું છે.
રશિયન ઈમરજન્સી મંત્રાલયે ભૂકંપના કારણે સુનામીની ચેતવણી જારી કરી નથી. જો કે, યુએસ સુનામી ચેતવણી પ્રણાલીએ ચેતવણી આપી હતી કે આ ભૂકંપના કારણે ભૂકંપના કેન્દ્રના 300 કિલોમીટરની અંદર રશિયાના દરિયાકાંઠે ખતરનાક સુનામી મોજાઓ આવી શકે છે. ભૂકંપના કારણે વિસ્તારના રહીશો ઘરની બહાર આવી ગયા હતા. અહેવાલો અનુસાર, ભૂકંપના કારણે ફર્નિચર પડી ગયું અને વાસણો તૂટી ગયા.
