નવી દિલ્હી : દિલ્હીની રાઉઝ એવન્યુ કોર્ટ આજે દિલ્હી એક્સાઇઝ કૌભાંડ કેસના આરોપી અરવિંદ કેજરીવાલની નિયમિત જામીન અરજી પર સુનાવણી કરશે. કોર્ટે અગાઉ અરવિંદ કેજરીવાલની વચગાળાની જામીન અરજી ફગાવી દીધી હતી.
કોર્ટની સુનાવણી : તમને જણાવી દઈએ કે, 7 જૂને સુનાવણી દરમિયાન EDએ અરવિંદ કેજરીવાલની નિયમિત જામીન અરજીનો વિરોધ કર્યો હતો. કેજરીવાલ તરફથી હાજર રહેલા વકીલ એન. હરિહરને કહ્યું કે, અમને થોડા સમય પહેલા EDના જવાબની કોપી મળી છે, અમને આ પદ્ધતિ સામે વાંધો છે. કોર્ટે પણ EDની આ પદ્ધતિ સામે વાંધો ઉઠાવ્યો હતો. ત્યારપછી ED તરફથી હાજર રહેલા ASG SV રાજુએ કહ્યું કે, કેજરીવાલ સિવાય અમારી પાસે બીજા પણ ઘણા કેસ છે જેને તપાસવાના છે. ત્યારે એન. હરિહરને ઉનાળાના વેકેશન દરમિયાન જ આ મામલે સુનાવણી કરવાની માંગ કરી હતી.
વચગાળાની જામીન અરજી નામંજૂર : આ પહેલા 5 જૂને કોર્ટે કેજરીવાલની સાત દિવસની વચગાળાની જામીન અરજી ફગાવી દીધી હતી. કોર્ટે તિહાર જેલ પ્રશાસનને કેજરીવાલના સ્વાસ્થ્ય સંબંધિત જરૂરી ટેસ્ટ કરાવવાનો નિર્દેશ આપ્યો હતો. ચુકાદા સંભળાવતા દરમિયાન કેજરીવાલના વકીલે તેમની તબિયત અંગે ચિંતા વ્યક્ત કરી હતી. ત્યારબાદ કોર્ટે કહ્યું હતું કે, તમને જ્યારે પણ સ્વાસ્થ્ય સંબંધી કોઈ ચિંતા હોય તો તમે કોર્ટમાં આવી શકો છો.
જામીન અરજી પર કોર્ટનો ચુકાદો : આપને જણાવી દઈએ કે 29 મેના રોજ સુપ્રીમ કોર્ટે અરવિંદ કેજરીવાલની સાત દિવસની વચગાળાની જામીન અરજી સ્વીકારવાનો ઇનકાર કરતા કહ્યું કે, કેજરીવાલની ધરપકડને પડકારવા અંગેનો નિર્ણય પહેલાથી જ અનામત રાખવામાં આવ્યો છે. તેથી વચગાળાના જામીન લંબાવવાની કેજરીવાલની અરજીનો મુખ્ય અરજી સાથે કોઈ સંબંધ નથી. આ સિવાય સુપ્રીમ કોર્ટે તેમને નિયમિત જામીન માટે ટ્રાયલ કોર્ટમાં જવાની પણ મંજૂરી આપી છે.
કેજરીવાલની જામીન અને આત્મસમર્પણ : કેજરીવાલની વચગાળાની અને નિયમિત જામીન અરજી પર સુનાવણી કરતી વખતે કોર્ટે 30 મેના રોજ EDને નોટિસ ઇસ્યુ કરી હતી. તમને જણાવી દઈએ કે 10 મેના રોજ સુપ્રીમ કોર્ટે અરવિંદ કેજરીવાલને 1 જૂન સુધી વચગાળાના જામીન આપ્યા અને 2 જૂને તેમને આત્મસમર્પણ કરવાનો આદેશ આપ્યો હતો. કેજરીવાલે 2 જૂને આત્મસમર્પણ કર્યું હતું.
