હૈદરાબાદ: ફ્રેન્ડશિપ ડે એ મિત્રો સાથેના અમૂલ્ય સંબંધોની ઉજવણી માટે સમર્પિત દિવસ છે. અલગ-અલગ પૃષ્ઠભૂમિના લોકો માત્ર આપણા જીવનમાં માત્ર સાથ જ નથી આપતા, પરંતુ આપણા જીવનમાં આવતી સમસ્યાઓ અને તણાવને ઘટાડવા માટે પણ સહભાગી બને છે.. મિત્રો જીવનને સરળ બનાવવા માટે આપણી સાથે હંમેશા પ્રત્યક્ષ કે પરોક્ષ રીતે ઊભા રહે છે. સીમાઓ, જ્ઞાતિ-ધર્મ, આર્થિક-સામાજિક પૃષ્ઠભૂમિને ધ્યાનમાં લીધા વિના મિત્રો જીવનમાં સંબંધોમાં મધુરતા ઉમેરીને સુખ પ્રદાન કરે છે.
આંતરરાષ્ટ્રીય ફ્રેન્ડશિપ ડે: આપને જણાવી દઈએ કે ફ્રેન્ડશિપ ડે વર્ષમાં બે દિવસ ઉજવવામાં આવે છે. 30 જુલાઈના રોજ આંતરરાષ્ટ્રીય ફ્રેન્ડશિપ ડે ઉજવવામાં આવે છે. આ દિવસને 2011માં સંયુક્ત રાષ્ટ્ર દ્વારા સત્તાવાર માન્યતા આપવામાં આવી હતી. જ્યારે ભારત જેવા કેટલાક દેશોમાં ઓગસ્ટ મહિનાના પહેલા રવિવારે ફ્રેન્ડશિપ ડે ઉજવવામાં આવે છે. આ વર્ષે, 4 ઓગસ્ટ મહિનાનો પહેલો રવિવાર છે. બંને દિવસો વિશ્વભરના લોકોને તેમના મિત્રો પ્રત્યે કૃતજ્ઞતા વ્યક્ત કરીને તેમના બંધનને મજબૂત કરવા પ્રોત્સાહિત કરે છે.
આ દિવસ માત્ર અંગત સંબંધોની ઉજવણી જ નથી પરંતુ વિવિધ સંસ્કૃતિઓ અને સમુદાયો વચ્ચે શાંતિ, સમજણ અને એકતાને પ્રોત્સાહન આપવા માટે મિત્રતાનું મહત્વનું માધ્યમ પણ છે. ઇન્ટરનેટ અને સોશિયલ મીડિયાના પ્રસાર પછી, આ દિવસ ખૂબ જ લોકપ્રિય બની ગયો છે. પશ્ચિમી દેશોની જેમ ભારતમાં પણ લોકો ફ્રેન્ડશીપ ડેની ઉજવણી માટે ફ્રેન્ડશીપ બેન્ડ, ગ્રીટીંગ્સ કાર્ડ, મોંઘી ભેટ અને પાર્ટીની સંસ્કૃતિ અપનાવી રહ્યા છે.
ફ્રેન્ડશિપ ડેનો ઇતિહાસ
ફ્રેન્ડશિપ ડેની વાત કરીએ તો તેની શરૂઆત 1950ના દાયકામાં અમેરિકામાં થઈ હતી. હોલમાર્ક કાર્ડ્સના સ્થાપક જોયસ હોલે સૌપ્રથમ મિત્રતાના સન્માન માટે સમર્પિત દિવસના વિચારને પ્રોત્સાહન આપ્યું હતું. અગાઉ આ માટે કોઈ ચોક્કસ તારીખ નક્કી કરવામાં આવી ન હતી. બાદમાં દેશ-વિદેશમાં ફ્રેન્ડશીપ ડેની લોકપ્રિયતા વધવા લાગી. 2011 માં, સંયુક્ત રાષ્ટ્રએ સાંસ્કૃતિક સંબંધોને ઉત્તેજન આપવા અને શાંતિને પ્રોત્સાહન આપવા માટે મિત્રતાના મહત્વ પર ધ્યાન કેન્દ્રિત કરવા માટે 30 જુલાઈને આંતરરાષ્ટ્રીય મિત્રતા દિવસ તરીકે નિયુક્ત કર્યા.
ભારતમાં ફ્રેન્ડશિપ ડે 2024: મહત્વ અને ઉજવણી
આ ખાસ દિવસ જૂના મિત્રો સાથે પુનઃજોડાણ કરવાની, વણસેલા સંબંધો સુધારવા અને તેઓ જેની કાળજી રાખે છે, તેમની સાથે ગુણવત્તાયુક્ત સમય પસાર કરવાની તક આપે છે. વિશ્વભરના સમુદાયો વિવિધ કાર્યક્રમોનું આયોજન કરે છે, જેમાં મિત્રતા-થીમ આધારિત તહેવારો, કોન્સર્ટ અને કલા પ્રદર્શનોનો સમાવેશ થાય છે જે સાંસ્કૃતિક વિવિધતાને ઉજવે છે અને પરસ્પર સમજણને પ્રોત્સાહન આપે છે.
ફ્રેન્ડશીપ ડેના સંદેશાઓને વિસ્તૃત કરવામાં ડિજિટલ પ્લેટફોર્મ મહત્વપૂર્ણ ભૂમિકા ભજવી રહ્યું છે. વ્યક્તિઓ અને સંસ્થાઓ વિશ્વભરના મિત્રો અને સમુદાયો સુધી પહોંચવા માટે પ્રેરણાદાયી વાર્તાઓ, અર્થપૂર્ણ અવતરણો અને એકતાના સંદેશાઓ શેર કરવા માટે સોશિયલ મીડિયા, બ્લોગ્સ અને વેબસાઇટ્સનો ઉપયોગ કરે છે.
