ચેંગલપટ્ટુઃ તામિલનાડુના ચેંગલપટ્ટુ જિલ્લામાં બુધવારે એક કારે રસ્તાના કિનારે બેઠેલી મહિલાઓને કચડી નાખી, જેના કારણે ગાયો ચરાવવા આવેલી પાંચ મહિલાઓના ઘટનાસ્થળે જ મોત થઈ ગયા. આ ઘટના મહાબલીપુરમ નજીક જૂના મહાબલીપુરમ રોડ પર બની હતી.
પોલીસના જણાવ્યા અનુસાર, એક ગામની પાંચ મહિલાઓ તેમની ગાયો ચરાવવા આવી હતી અને રસ્તાના કિનારે બેઠી હતી. ત્યારે ચેન્નાઈથી પુડુચેરી તરફ જઈ રહેલી એક ઝડપી કારે રસ્તાના કિનારે બેઠેલી આ મહિલાઓને ટક્કર મારી હતી.
જણાવવામાં આવ્યું છે કે અકસ્માતમાં પાંચ મહિલાઓના મોતના કારણે વિસ્તારમાં તણાવનો માહોલ છે. સ્થાનિક લોકોએ કાર ચાલક સહિત બે લોકોને પકડી લીધા છે, જ્યારે તેમાં સવાર અન્ય લોકો નાસી છૂટ્યા છે.
સ્થાનિક લોકો પાસેથી ઘટનાની માહિતી મળ્યા પછી, પોલીસ ઘટનાસ્થળે પહોંચી અને મહિલાઓના મૃતદેહને પોતાની કસ્ટડીમાં લીધા અને પોસ્ટમોર્ટમ માટે ચેંગલપટ્ટુ સરકારી હોસ્પિટલમાં મોકલી દીધા.
તેમજ સ્થાનિક લોકોએ પકડેલા બંને લોકોને પોલીસે વાહનમાં બેસાડી મહાબલીપુરમ પોલીસ સ્ટેશન લઈ જવાનો પ્રયાસ કર્યો હતો. આ બાબતે ત્યાં હાજર લોકોએ પોલીસ સાથે દલીલો કરી હતી અને રસ્તા પર બેસીને વિરોધ પણ કર્યો હતો. તેમણે માગણી કરી હતી કે નિર્દોષ મહિલાઓના મોત માટે જવાબદારોને વાહનમાંથી નીચે ઉતારવા જોઈએ. જેના કારણે થોડો સમય માર્ગ પર વાહન વ્યવહારને અસર થઈ હતી.
કાર સવારો દારૂના નશામાં હતા
પોલીસના જણાવ્યા અનુસાર, મૃતક મહિલાઓની ઉંમર 50 વર્ષથી વધુ છે અને તેમની ઓળખ કાથાઈ, વિજયા, ગૌરી, લોકમ્મલ અને યશોદા તરીકે થઈ છે. પોલીસે જણાવ્યું કે અકસ્માત સર્જનાર લોકો દારૂના નશામાં હતા અને તેમાંથી બેની ધરપકડ કરવામાં આવી છે, જ્યારે અન્ય ભાગી ગયા છે અને તેમની શોધ કરવામાં આવી રહી છે.
