কাকপথাৰত মৰাণ বিহু নাচ কৰ্মশালাৰ সফল সামৰণি

মঙলবাৰে আনুষ্ঠানিকভাৱে সামৰণি পৰে কাকপথাৰৰ বৰালি গাঁৱত অনুষ্ঠিত হোৱা 15 দিনীয়া মৰাণ বিহু নাচ কৰ্মশালা ৷ মৰাণ কলা সংস্কৃতি বিকাশ কেন্দ্ৰৰ উদ্যোগত তথা বৰালিবাসীৰ সহযোগত 2020 বৰ্ষৰ 20 ডিচেম্বৰৰ পৰা বৰালি মধ্য ইংৰাজী বিদ্যালয় প্ৰাংগণত চলি থকা কৰ্মশালাত অঞ্চলটোৰ প্ৰায় দুই শতাধিক সৰু-বৰ নাচনীয়ে অংশগ্ৰহণ কৰে ৷ অপ-সংস্কৃতিৰ গ্ৰাসত হেৰাই যাবলৈ ধৰা অসমৰ অন্যতম ভূমিপুত্ৰ জনগোষ্ঠী মৰাণসকলৰ ঐতিহাসিক মৰাণ বিহু নাচ জীয়াই ৰখাৰ লগতে উঠি অহা প্ৰজন্মক নিজৰ কৃষ্টি-সংস্কৃতি দেখুৱাই দিয়াৰ প্ৰচেষ্টাৰে গ্ৰহণ কৰা হৈছে এই কাৰ্যসূচী ৷