পিষ্টল বিক্ৰী কৰিবলৈ আহি অসম ৰাইফলছৰ জালত মণিপুৰৰ উগ্ৰপন্থী কেডাৰ

শিলচৰ,27 নৱেম্বৰ : অসমত অস্ত্ৰসহ অশান্ত গ্ৰেপ্তাৰ চুবুৰীয়া ৰাজ্য মণিপুৰৰ উগ্ৰপন্থী ৷ কাছাৰৰ জিৰিঘাটত গ্ৰেপ্তাৰ হ’ল মণিপুৰৰ উগ্ৰপন্থী সংগঠন United Tribal Liberation Army (S.K Thadou) ৰ এজন সক্ৰিয় কেডাৰ । অসম ৰাইফলছ আৰু কাছাৰৰ জিৰিঘাট আৰক্ষীৰ যৌথ অভিযানত গ্ৰেপ্তাৰ হয় উগ্ৰপন্থী গোটটোৰ কেডাৰজন । ধৃত কেডাৰজনৰ নাম হেনলেনমাং লহৌভম (Henlenmang Lhouvum) ৷

তথ্য অনুসৰি, চুবুৰীয়া ৰাজ্য মণিপুৰৰ ৰাজ্যৰ সেনাপতি জিলাত ঘৰ ধৃত উগ্ৰপন্থীজনৰ। গোপন সূত্ৰৰ ভিত্তিত অসম ৰাইফলছ আৰু জিৰিঘাট আৰক্ষীৰ এটা দলে শনিবাৰে অসম মণিপুৰ সীমান্তৰ জিৰিঘাট লক্ষীনগৰ খাছিয়া পুঞ্জীত অভিযান চলাই উগ্ৰপন্থীজনক গ্ৰেপ্তাৰ কৰিবলৈ সক্ষম হয় । লগতে অভিযানকাৰী দলটোৱে ধৃত উগ্ৰপন্থীজনৰ তালাচী চলাই এটা .32 পিষ্টলসহ ৫ জাই সজীৱ গুলী উদ্ধাৰ কৰে ।

আৰক্ষীয়ে জানিবলৈ দিয়া মতে, ধৃত যুৱকজন মণিপুৰৰ উগ্ৰপন্থী সংগঠন United Tribal Liberation Army (S.K Thadou) ৰ এক সক্ৰিয় কেডাৰ ৷ সীমান্তৰ জিৰিঘাট লক্ষীনগৰ খাছিয়া পুঞ্জীত তেওঁ পিষ্টল বিক্ৰী কৰিবলৈ আহিছিল বুলি জানিবলৈ দিয়ে আৰক্ষীয়ে । ঘটনা সন্দৰ্ভত আৰক্ষীৰ তদন্ত অব্যাহত ।

লগতে পঢ়ক : মহানগৰীৰ কামাকাজী বাৰ এণ্ড ৰেষ্টুৰেণ্টত ভয়ংকৰ অগ্নিকাণ্ড