বিশ্বনাথত বিদ্যুৎস্পৃষ্ট হৈ শ্ৰমিকৰ মৃত্যু

বিশ্বনাথ, 13 ডিচেম্বৰ : মঙলবাৰে বিয়লি বিশ্বনাথৰ ফলফলিত সংঘটিত হ'ল এক কৰুণ ঘটনা ৷ বিশ্বনাথ চাৰিআলিৰ এজন ব্যক্তিৰ ঘৰত কাম কৰি থকাৰ সময়তে এজন যুৱক বৈদ্যুতিক তাঁৰত লাগি শ্বৰ্ট চাৰ্কিটৰ ফলত মৃত্যু হয় ৷

উল্লেখ যে বিশ্বনাথৰ ফলফলিৰ ৰাম চকল ভকত নামৰ ব্যক্তিজনৰ গৃহ নিৰ্মাণৰ কাম চলি আছিল ৷ গৃহ নিৰ্মাণৰ কামত শ্ৰমিকগৰাকীয়ে কিছু দিনৰ পৰা নিয়োজিত হৈ আছিল ৷ আন দিনৰ দৰে আজিও কামত লাগি আছিল শ্ৰমিক তিনিজন ৷ কিন্তু হঠাৎ তিনিজন শ্ৰমিকৰ মাজত এজন শ্ৰমিক বৈদ্যুতিক তাঁৰৰ সংস্পৰ্শলৈ আহি শ্বৰ্ট চাৰ্কিট হৈ কাম কৰি থকা স্থানতে ঢলি পৰে ৷ লগে লগে আন এজন শ্ৰমিকে বিদ্যুৎ সংযোগ হৈ পৰি যোৱা যুৱকজনক উদ্ধাৰ কৰিবলৈ লওঁতে তেওঁৰ দেহতো শ্বৰ্ট চাৰ্কিট হয় ৷

লগে লগে আন এজন শ্ৰমিকে এই ঘটনা প্ৰত্যক্ষ কৰি বিদ্যুৎ সংযোগ বিচ্ছিন্ন কৰে ৷ মাটিত পৰি যোৱা শ্ৰমিকজনক ততাতৈয়াকৈ বিশ্বনাথ চাৰিআলি অসামৰিক চিকিৎসালয়লৈ অনা হয় যদিও চিকিৎসকে শ্ৰমিকজনক মৃত বুলি ঘোষণা কৰে ৷ মৃত্যু হোৱা যুৱকজন পাভৈ কমল পুৰৰ দেবজিৎ কাচেৰ বুলি চিনাক্ত কৰা হৈছে ৷

অতি দৰিদ্ৰ পৰিয়ালৰ দেবজিৎ কাচেৰে পিতৃৰ অসুস্থতাৰ বাবে পৰিয়াল চলাবলৈ শ্ৰমিক হিচাপে কাম কৰিবলৈ আহি এই দৰে কৰুণ মৃত্যুক সাৱতি লোৱা ঘটনাই শোকৰ ছাঁ পেলাইছে অঞ্চলটোত ৷ ইফালে ঘটনস্থলীত জিলা দণ্ডাধীশ উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে বিহালীলৈ প্ৰেৰণ কৰে ৷ 

লগতে পঢ়ক : লংকাত শতাধিক চুৰি ম'বাইলসহ চোৰক আটক