6 ডিচেম্বৰৰ পৰা পাঁচদিনীয়া কাৰ্যসূচীৰে মেৰেৰচৰ উচ্চতৰ মাধ্যমিক বিদ্যালয়ৰ সোণালী জয়ন্তী

বঙাইগাওঁ, 4 ডিচেম্বৰ : বঙাইগাওঁ জিলাৰ মেৰেৰচৰ উচ্চতৰ মাধ্যমিক বিদ্যালয়ৰ সোণালী জয়ন্তী বৰ্ষৰ সামৰণি অনুষ্ঠানৰ প্ৰস্তুতি তুংগত ৷ 'স্বৰ্ণ সৌৰভ' নামেৰে উদযাপন কৰা হ’ব বঙাইগাঁও জিলাৰ অভয়াপুৰীৰ মেৰেৰচৰ উচ্চতৰ মাধ্যমিক বিদ্যালয়খনৰ সোণালী জয়ন্তী সমাৰোহ ৷

6, 7, 8, 9 আৰু 10 ডিচেম্বৰত পাঁচ দিনীয়া বৰ্ণাঢ্য কাৰ্যসূচীৰে উদযাপন কৰা হ'ব শিক্ষানুষ্ঠানখনৰ সোণালী জয়ন্তী বৰ্ষৰ সামৰণি অনুষ্ঠান ৷ তদুপলক্ষে উদযাপন সমিতিয়ে এই বৰ্ণাঢ্য কাৰ্যসূচী সাফল্যমণ্ডিত কৰি তুলিবলৈ দিনে-নিশাই শ্ৰমদান কৰি ৰভা, তোৰণ আৰু আটকধুনীয়া মঞ্চ নিৰ্মাণৰ কাম অব্যাহত ৰাখিছে ৷

সোণালী জয়ন্তী সমাৰোহ উপলক্ষে অনুষ্ঠিত হ’ব বিভিন্ন বৌদ্ধিক আৰু সাংস্কৃতিক কাৰ্যসূচী ৷ এই অনুষ্ঠানৰ মুকলি সভাত ৰাজ্যৰ শিক্ষা মন্ত্ৰী ডাঃ ৰণোজ পেগু উপস্থিত থাকিব বুলি জানিবলৈ দিয়ে উদযাপন সমিতিয়ে ৷  

পাঁচদিনীয়া এই কাৰ্যসূচী সাফল্যমণ্ডিত কৰি তুলিবলৈ ৰাইজৰ লগতে প্ৰাক্তন ছাত্ৰ-ছাত্ৰী সকলোৰে সহায়-সহযোগিতা কামনা কৰিছে উদযাপন সমিতিয়ে ৷ 

লগতে পঢ়ক : তিনিদিনীয়া কাৰ্যসূচীৰে আৰম্ভ টিংখাং উচ্চতৰ মাধ্যমিক বিদ্যালয়ৰ মহাৰজত জয়ন্তীৰ সামৰণি অনুষ্ঠান