বাইকৰ পৰা নিৰ্গত হোৱা তেলে ডিব্ৰুগড়ত ছাৰখাৰ কৰিলে এখন ঘৰ

মৰাণ, 17 নৱেম্বৰ : ডিব্ৰুগড় জিলাত বিধ্বংসী অগ্নিকাণ্ড । ডিব্ৰুগড় চহৰৰ জকাইৰ 2 নং মহমাৰীত বৃহস্পতিবাৰে বিয়লি সংঘটিত হয় ভয়াৱহ অগ্নিকাণ্ডৰ ঘটনা । শ্ৰীকান্ত মূড়া নামৰ চাহ শ্ৰমিকজনৰ ঘৰত এই অগ্নিকাণ্ড সংঘটিত হয় । ঘৰত থৈ দিয়া এখন বাইকৰ পৰা নিৰ্গত হোৱা তেলৰ পৰা এই অগ্নিকাণ্ডৰ সূত্ৰপাত হোৱা বুলি জানিব পৰা গৈছে ।

এই অগ্নিকাণ্ডত শ্ৰীকান্ত মূড়াৰ বাসগৃহটো সম্পূৰ্ণৰূপে ভষ্মীভূত হয় । ইফালে এই ঘটনাত তেল নিৰ্গত হোৱা বাইকখন সম্পূৰ্ণৰূপে জুইত জাহ যায় । ঘটনা সংঘটিত হোৱাৰ পিচত বহু পলমকৈ ঘটনাস্থলীত ডিব্ৰুগড়ৰ অগ্নিনিৰ্বাপক বাহিনীৰ লোক উপস্থিত হৈ জুই নিৰ্বাপন কৰিবলৈ সক্ষম হয় যদিও তেতিয়ালৈ মূড়াৰ বাসগৃহটো সম্পূৰ্ণৰূপে ভস্মীভূত হয় ।

স্থানীয় ৰাইজে ঘটনাস্থলীৰ পৰা কেৱল কেইটামানহে ধানৰ বস্তা উদ্ধাৰ কৰিবলৈ সক্ষম হয় । ইতিমধ্যে ঘটনাস্থলীত বৰবৰুৱা আৰক্ষী উপস্থিত হৈ তদন্ত অব্যাহত ৰাখিছে । এই অগ্নিকাণ্ড ঘটনাই অঞ্চলটোত আতংকিত পৰিৱেশৰ সৃষ্টি কৰিছে ।

লগতে পঢ়ক : Youth stabbed to death : যুৱকক চোকা অস্ত্ৰৰে হানি খুচি হত্যা