জনীয়াত অচিনাক্ত লোকৰ মৃতদেহ উদ্ধাৰ, শৰীৰত তেজৰ চিন পৰিলক্ষিত

জনীয়া, 20 ডিচেম্বৰ : বৰপেটা জিলাৰ জনীয়া সমষ্টিৰ সৰভোগ আৰক্ষী থানাৰ অন্তৰ্গত ৰূপসীৰ কলগাছিয়া সৰভোগ পথৰ কাষত এগৰাকী অচিনাক্ত ব্যক্তিৰ মৃতদেহ উদ্ধাৰ কৰা হৈছে ৷ বুধবাৰে পুৱা স্থানীয় লোকে মৃতদেহটো প্ৰত্যক্ষ কৰি সৰভোগ আৰক্ষীক খবৰ দিয়ে। খবৰ পোৱাৰ লগে লগে ঘটনাস্থলীত আৰক্ষী আৰু চক্ৰ বিষয়া উপস্থিত হৈ তদন্ত আৰম্ভ কৰে। 

লোকজনক দুৰ্বৃত্তই হত্যা কৰি পথৰ দাঁতিত পেলাই থৈ যোৱাৰ সন্দেহ প্ৰকাশ কৰিছে ৰাইজে। ক’লা ৰঙৰ জীনচ, টেন (Tan) ৰঙৰ চুৱেটাৰ আৰু ক’লা ৰঙৰ মোজা পৰিধান কৰা মৃতদেহটোৰ শৰীৰত তেজৰ চেঁকুৰা স্পষ্টভাৱে দেখা পোৱা গৈছে । বাতৰি লিখা পৰ্যন্ত চিনাক্ত কৰিব পৰা নাই মৃতদেহটো। 

স্থানীয় ৰাইজে জানিবলৈ দিয়া মতে বিভিন্ন সময়ত ৰূপসী এলেকাৰ কলগাছিয়া সৰভোগ পথৰ ওচৰত এনে ধৰণৰ ঘটনা সংঘটিত হৈ আহিছে। যাৰ বাবে স্থানীয় ৰাইজে ৰূপসীত এখন আৰক্ষী চকী স্থাপনৰ বাবে চৰকাৰৰ ওচৰত দাবী উত্থাপন কৰে। এই মৃতদেহটো ক’ৰপৰা কেনেকৈ আহিল, এয়া হত্যা নে আন কিবা সেয়া মৰণোত্তৰ পৰীক্ষাৰ পিচতহে পোহৰলৈ আহিব ৷

লগতে পঢ়ক: মহানগৰীৰ ফটাশিলত নাহৰফুটুকীৰ আক্ৰমণত আহত তিনিজন