CM vigilance raid: উৎকোচ লৈ দুৰ্নীতি নিবাৰক শাখাৰ জালত খণ্ড উন্নয়ন বিষয়া শেৱালী চক্ৰৱৰ্তী

নগাঁও/বঢ়মপুৰ, 15 অক্টোবৰ: নাও বুৰিলেও টিঙৰ পৰা নানামে একাংশ চৰকাৰী কৰ্মচাৰী ৷ ৰাজ্যত দুৰ্নীতিগ্ৰস্ত বিষয়া কৰ্মচাৰীৰ বিৰুদ্ধে বিগত কিছুদিন ধৰি ধাৰাবাহিক অভিযান অব্যাহত আছে ৷ জালত পৰিছে এজনৰ পিচত আন এজন খঁকুৱা বিষয়া ৷ এইবাৰ দুৰ্নীতি নিবাৰক শাখাৰ জালত দুৰ্নীতিগ্ৰস্ত খণ্ড উন্নয়ন বিষয়া শেৱালী চক্ৰৱৰ্তী ৷ আঁচনিৰ বিল মোকলাই দিয়াৰ নামত দহ হাজাৰ টকা উৎকোচ লৈ দুৰ্নীতি নিবাৰক শাখাৰ জালত পৰে BDO শেৱালী চক্ৰৱৰ্তী ৷ BDO গৰাকীৰ নগাঁৱৰ বাসগৃহতো অভিযান চলায় দুৰ্নীতি নিবাৰক শাখাই ৷

দীর্ঘদিনৰ পৰাই চৰকাৰী আঁচনি ৰূপায়ণৰ নামত বিয়াগোম দুৰ্নীতি সংঘটিত কৰি অহাৰ অভিযোগ উত্থাপিত হৈ আছিল BDO গৰাকীৰ বিৰুদ্ধে ৷ দেওবাৰে নিজ কঠীয়াতলী ৰাষ্ট্ৰীয় ঘাইপথৰ কাষতে বিনাকান্দি উন্নয়ন খণ্ডৰ এক আঁচনিৰ বিল মোকোলাই দিয়াৰ নামত গ্ৰহণ কৰিছিল দহ হাজাৰ টকাৰ উৎকোচ ৷ সেই সময়তেই দুৰ্নীতি নিবাৰক শাখাৰ নগদ দহ হাজাৰ টকাসহ গ্ৰেপ্তাৰ কৰে বিনাকান্দি উন্নয়ন খণ্ডৰ খণ্ড উন্নয়ন বিষয়া শেৱালী চক্ৰৱৰ্তীক ৷ ইতিমধ্যে BDO গৰাকীক গ্ৰেপ্তাৰ কৰাৰ তথ্য দুৰ্নীতি নিবাৰক শাখাই সামাজিক মাধ্যম যোগে ৰাজহুৱা কৰিছে ৷

ইফালে শেৱালী চক্ৰৱৰ্তীৰ নগাঁও চহৰৰ আমোলাপট্টিস্থিত বাসগৃহতো অভিযান চলায় দুৰ্নীতি নিবাৰক শাখাৰ আন এটা দলে ৷ অৱশ্যে বাসগৃহত চলোৱা অভিযানত দুৰ্নীতি নিবাৰক শাখাৰ দলটোৱে কি কি জব্দ কৰিছে সেয়া এই পৰ্যন্ত জানিব পৰা হোৱা নাই ৷ স্মৰ্তব্য যে, বিনাকান্দি উন্নয়ন খণ্ডত ব্যাপক দুৰ্নীতি সংঘটিত কৰা BDO শেৱালী চক্ৰৱৰ্তী বিগত কিছুদিন ধৰি ব্যাপক চৰ্চাত আছিল ৷

লগতে পঢ়ক: Case registered against fake guide : আমেৰিকাৰ নৌসেনা বিষয়াক ভুৱা গাইডে ভ্ৰমণ কৰালে তাজমহল, গোচৰ পঞ্জীয়ন