ড৹ হীৰেন গোহাঁইৰ মন্তব্যক ভিত্তিহীন আখ্যা আছুৰ সভাপতি উৎপল শৰ্মাৰ

নলবাৰী, ১৮ ডিচেম্বৰ : ‘‘ড৹ হীৰেন গোহাঁই ডাঙৰীয়াই ড৹ সমুজ্জ্বল ভট্টাচাৰ্যক বিজেপিৰ লগত থাকি কা বিৰোধিতা কৰা বুলি যি অদ্ভূত মন্তব্য কৰিছে সেয়া সঁচাই আশ্বৰ্যজনক ৷ ড৹ গোহাঁই ডাঙৰীয়াৰ দৰে এগৰাকী ব্যক্তিয়ে কোনো তথ্য নোহোৱাকৈ এনে মনে সজা কথা কোৱাটো শোভা নাপায় ৷ সেয়ে তেখেতক তেনে কথা কোৱাৰ পৰা বিৰত থাকিবলৈ আহ্বান জনাইছো’’ ৷ এই মন্তব্য আছুৰ সভাপতি উৎপল শৰ্মাৰ ৷

আছুৰ সভাপতিগৰাকীয়ে আৰু কয়, ‘‘অসম আন্দোলনৰ সময়ৰে পৰা ড৹ হীৰেন গোহাঁই ছাৰ ছাত্ৰ সন্থাৰ সকলো কামৰ বিৰোধী ৷ তেখেতৰ লগত আমাৰ আদৰ্শগত তফাৎ আছে ৷ সেই সূত্ৰে তেওঁ ড৹ সমুজ্জ্বল ভট্টাচাৰ্যক বিৰোধিতা কৰাটো স্বাভাৱিক ৷ কিন্তু ড৹ সমুজ্জ্বল ভট্টাচাৰ্যৰ বিৰুদ্ধে তেখেতে কৰা মন্তব্যটো সম্পূৰ্ণ ভিত্তিহীন আৰু মিছা কথা’’ ৷

উল্লেখ্য যে, দেওবাৰে নলবাৰীৰ বৰভাগত অনুষ্ঠিত কৰা হয় ‘‘বৰভাগ গ্ৰন্থমেলা’’ ৷ এই গ্ৰন্থমেলাৰ মুকলি সভাত অংশগ্ৰহণ কৰে সদৌ অসম ছাত্ৰ সন্থাৰ সভাপতি উৎপল শৰ্মাই ৷ এই অনুষ্ঠানত অংশ লৈ বৰভাগ গ্ৰন্থমেলাৰ লগতে ড৹ হীৰেন গোহাঁই সন্দৰ্ভত সংবাদ মাধ্যমৰ আগত কেতবোৰ মন্তব্য প্ৰদান কৰে ৷

লগতে পঢ়ক : পুণেত পথ দুৰ্ঘটনা; একেটা পৰিয়ালৰে ৪ জন লোক নিহত