Sidharth Kiara wedding updates: কইনা কিয়াৰা পালেগৈ জয়সালমেৰ, এয়াৰপ’ৰ্টত দৰাৰ নাই দেখা সাক্ষাৎ

চিটাৰা ডেস্ক, 4 ফেব্ৰুৱাৰী : কইনা কিয়াৰা আদৱানীক দেখা গ’ল ৰাজস্থানৰ জয়সালমেৰত ৷ জয়সালমেৰত উপস্থিত হোৱাৰ লগে লগে সকলোৱে হাঁহিৰে সম্ভাষণ জনালে অভিনেত্ৰীগৰাকীক ৷ এক দীঘলীয়া সময় ধৰি আলোচনা হৈ থকা বিয়াখন অৱশেষত তেনেই কাষত ৷ আৰম্ভ হৈ গৈছে সিদ্ধাৰ্থ মালহোত্ৰাৰ সৈতে কিয়াৰাৰ বিয়াৰ কাউণ্টডাউন । খবৰ অনুসৰি সিদ্ধাৰ্থ আৰু কিয়াৰা চাৰ্টাৰ্ড বিমানেৰে জয়সালমেৰত উপস্থিত হয় । এয়াৰপ’ৰ্টৰ পৰা কিয়াৰাৰ এটা ভিডিঅ’ ভাইৰেল হৈ পৰিছে য’ত অভিনেত্ৰী গৰাকীক সতেজ ৰূপত দেখিবলৈ পোৱা গৈছে ৷ মুখত এমোকোৰা হাঁহি লৈ গাড়ীৰ ফালে আগবাঢ়ি যোৱা কিয়াৰাই উপস্থিত সকলোকে সম্ভাষণ জনোৱা দেখা গৈছে ৷ 

কিয়াৰাই পৰিধান কৰিছিল বগা সাজ ৷ গাত মেৰিয়াই লৈছিল উজ্জ্বল গুলপীয়া ৰঙৰ এখন স্কাৰ্ফ ৷ কিয়াৰাৰ সৈতে ফেশ্বন ডিজাইনাৰ মনীষ মালহোত্ৰাকো দেখা গ’ল এয়াৰপ’ৰ্টত । কিয়াৰা আৰু মনীষক জয়সালমেৰ বিমানবন্দৰত দেখা পোৱাৰ বিপৰীতে কিন্তু এতিয়ালৈকে হ’বলগীয়া দৰা কাৰো চকুত পৰা নাই (Kiara Advani wedding with Sidharth Malhotra) ৷ শুনিবলৈ পোৱা মতে দৰাই এককভাৱে প্ৰস্থান কৰিছিল । কিয়াৰাৰ পূৰ্বে বলীউডৰ সকলোৰে প্ৰিয় মেহেন্দী শিল্পী বীনা নাগদাও মুম্বাইৰ পৰা জয়সালমেৰত উপস্থিত হৈছিল কইনাৰ হাত মেহেন্দীৰে শোভা বঢ়াবলৈ ।

প্ৰাপ্ত বাতৰি মতে দেওবাৰৰ পৰা আৰম্ভ হ’ব বিয়াৰ পূৰ্বৰ অনুষ্ঠানসমূহ । জয়সালমেৰৰ পেলেচ হোটেল দ্য সূৰ্যগড়ত বিয়াৰ সকলো আয়োজন কৰা হৈছে । ইতিমধ্যে দম্পতিৰ পৰিয়ালৰ সদস্যৰ লগতে বন্ধু-বান্ধৱী সকলো আহি তাত উপস্থিত হৈছেহি বুলি খবৰ আহিছে । অন্য নিমন্ত্ৰিত অতিথি আৰু আত্মীয়-স্বজন দেওবাৰে জয়সালমেৰ পাবগৈ । অতিথি তালিকাত বলীউডৰ ভাইজান ছলমান খান, বিকী কৌশল, কেটৰিণা কাইফ, কৰণ জোহৰকে ধৰি আৰু বহুতৰ নাম অন্তৰ্ভুক্ত হৈছে বুলি জানিব পৰা গৈছে (Sidharth Kiara wedding updates)।

লগতে পঢ়ক : Athiya Shetty KL Rahul photos: বিয়াৰ পিছত প্ৰথমবাৰৰ বান্দ্ৰাত দেখা গ’ল আথিয়া-ৰাহুলক