দৰাৰ কান্ধত উঠি শহুৰৰ ঘৰলৈ যাত্ৰা ন-কইনাৰ

বিয়াৰ পিছতে কইনাক বিলাসী বাহনত দৰাই ঘৰলৈ অনাৰ দৃশ্য আপুনি দেখিছে । বিলাসী বাহনেৰে নোৱাৰিলেও সাধাৰণ বাহন এখনৰ হ'লেও যোগাৰ কৰে দৰাই । পিছে এইবাৰ নাৱত উঠিল নৱ বিবাহিত দৰা-কইনা । বিয়াৰ পিছতে কইনাক ঘৰলৈ আনিবলৈ দৰাই ভাড়া কৰিলে এখন নাও । কইনাক আনকি খোজ কাঢ়িবলৈও নিদিলে দৰাই । নাৱৰ পৰা নামিয়ে এইবাৰ দৰাৰ কান্ধত উঠিল কইনা । এই ভিডিঅ' সামাজিক মাধ্যমত ভাইৰেল হোৱাৰ লগে লগে এতিয়া চৰ্চা অব্যাহত আছে । এই ভিডিঅ' বিহাৰৰ কিষাণগঞ্জৰ । নেৰানেপেৰা বৰষুণৰ ফলত বিহাৰৰ বিভিন্ন অঞ্চল প্লাৱিত হৈছে । কিষাণগঞ্জৰো বিভিন্ন অঞ্চলত বানে প্ৰভাৱ পেলাইছে । তেনে সময়তে এখন বিবাহ সম্পন্ন হয় । কিন্তু বানপানীৰ বাবে দৰাঘৰীয়াই ভাড়া কৰিবলগীয়া হয় এখন নাও । তেওঁলোকে নাৱেৰে আধা যাত্ৰা কৰিলে যদিও অঞ্চলটোত কানকাই নদীত তীব্ৰ বান পৰিস্থিতিৰ বাবে নাও যাত্ৰা আধাতে সামৰিব লগীয়া হয় । দৰাৰ লগতে বাকীবোৰ সদস্যই নাৱৰ পৰা পানীত নামিলে যদিও কইনাই অসুবিধা পাইছিল নাৱৰ পৰা নামিবলৈ । সেয়ে দৰাই কান্ধতে তুলি ল'লে কইনাক আৰু ঘৰলৈ বুলি যাত্ৰা আৰম্ভ কৰিলে । নৱ বিবাহিত দৰা কইনাৰ এই বিশেষ ভিডিঅ'টো এতিয়া সামাজিক মাধ্যমত ভাইৰেল হৈ পৰাৰ লগে লগে তীব্ৰ প্ৰতিক্ৰিয়াৰ সৃষ্টি হৈছে । কইনাৰ প্ৰতি দৰাৰ মৰমৰ কথাও বহুতে উল্লেখ কৰিছে ।