New Assamese short film: মুক্তি পালে নতুন অসমীয়া চুটি ছবি ‘ প্ৰেমৰ ঢৌ’

প্ৰেম বুলিলে সততেই আমাৰ মনলৈ আহে নাৰী-পুৰুষৰ মাজৰ প্ৰেম ৷ কিন্তু নৰ-নাৰীৰ প্ৰেমতকৈয়ো উৰ্দ্ধত এই প্ৰেম সাগৰৰ গভীৰতা, আকাশৰ বিশালতা ৷ পিতৃ-মাতৃৰ প্ৰেম, ভাতৃ-ভগ্নীৰ প্ৰেম, বন্ধুত্বৰ প্ৰেম, চাৰিওফালে মাথোঁ প্ৰেমৰেই সমাহাৰ ৷ প্ৰেমৰ প্ৰতিটো আকাৰকে সামৰি লৈ লখিমপুৰ জিলাৰ নাৰায়ণপুৰৰ এজাক উদীয়মান যুৱক-যুৱতীয়ে নিৰ্মাণ কৰি উলিয়াইছে এখন অসমীয়া বাস্তৱধৰ্মী চুটি ছবি ‘প্ৰেমৰ ঢৌ’ ৷ কৰ্মোদ্যমী নৱ-প্ৰজন্মৰ আশাসুধীয়া প্ৰচেষ্টাত আজি প্ৰাণ পায় উঠিল ‘প্ৰেমৰ ঢৌ’ ৷ ছবিখন নাৰায়ণপুৰ আদৰ্শ উচ্চ মাধ্যমিক বিদ্যালয়ৰ প্ৰেক্ষাগৃহত শুভমুক্তি দিয়া হয় ৷ ছবিখন পৰিচালনা কৰিছে ৰঞ্জন বৰাই ৷ প্ৰযোজক হিচাপে কাম কৰিছে ঈষাণ নয়ন শইকীয়াই ৷ ছবিখনত কমেও পোন্ধৰটা চৰিত্ৰৰ সংযোজন আপোনালোকে দেখিবলৈ পাব ৷ নাৰায়ণপুৰ আদৰ্শ উচ্চ মাধ্যমিক বিদ্যালয়ত আনুষ্ঠানিকভাৱে ছবিখন শুভমুক্তি দিয়ে বিশিষ্ট শিক্ষক ক্ষেত্ৰধৰ চাবুকধৰাই ৷ ইয়াৰ পূৰ্বে ঈষাণ নয়নে ‘সূৰ্যোদয়’ আৰু ‘পাকচক্ৰ’ নামৰ দুখন চুটি ছবি প্ৰযোজনা কৰি বিভিন্ন ক্ষেত্ৰত পুৰস্কাৰ বুটলিবলৈ সক্ষম হৈছিল ৷ প্ৰেমৰ ঢৌ ছবিখন দৰ্শকে আকোঁৱালি ল’ব বুলি আশাপ্ৰকাশ কৰিছে প্ৰযোজক পৰিচালকৰ লগতে ছবিখনত অভিনয় কৰা শিল্পীসকলে ৷