গুৱাহাটী, ১৪ নৱেম্বৰ: আজি বিশ্ব ডায়েবেটিছ দিৱস ৷ ১৯৯১ চনৰ পৰা জনসাধাৰণৰ মাজত সজাগতা সৃষ্টি কৰাৰ উদ্দেশ্য বিশ্বজুৰি ১৪ নৱেম্বৰৰ দিনটো ডায়েবেটিছ দিৱস পালন কৰি অহা হৈছে ৷ বৰ্তমান সময়ত সমগ্ৰ বিশ্বজুৰি ডায়েবেটিছ এক গুৰুতৰ সমস্যা হৈ পৰিছে ৷ দেশত বৰ্তমান প্ৰতি ১১ জনৰ লোকৰ ভিতৰত বৰ্তমান ১ লোক আক্রান্ত হৈছে ডায়েবেটিছ বা মধুমেহ ৰোগত ৷ ডায়েবেটিছ হ’লে মানুহৰ চকু, কিডনী, হাৰ্ট আদিও বেয়া হৈ যায় ৷ সেয়ে এইবোৰ ক্ষেত্ৰত মানুহক সজাগ কৰিবলৈ এই দিৱস পালন কৰি অহা হৈছে ৷
ডায়েবেটিছ ৰোগৰ কাৰণ সমূহ কি কি ?
বিভিন্ন কাৰণত এজন লোক ডায়েবেটিছ ৰোগত আক্ৰান্ত হ’ব পাৰে ৷ সেইসমূহৰ ভিতৰত খাদ্যজনিত, জীৱন ধাৰণৰ পদ্ধতি, মানসিক চাপ, বংশগত, মেদবহুলতাজনিত আদি প্ৰধান কাৰণ ৷ যদিহে এটা পৰিয়াল মাক- দেউতাকৰ ডায়েবেটিছ থাকে বা বংশপৰিয়ালৰ থাকে তেন্তে তেওঁলোকৰ সন্তানৰ ডায়েবেটিছ হোৱাৰ সম্ভাৱনা থাকে ৷
যদিহে পিতৃ-মাতৃ দুয়োগৰাকীৰে ডায়েবেটিছ থাকে তেন্তে তেওঁলোকৰ সন্তানৰ ৯০ শতাংশ ডায়েবেটিছ হোৱাৰ সম্ভাৱনা থাকে ৷ আনহাতে যদি কেৱল পিতৃ বা মাতৃৰ দুয়োগৰাকীৰ এগৰাকীৰহে যদি ডায়েবেটিছ থাকে তেন্তে সন্তানৰ ৫০ শতাংশ ডায়েবেটিছ হোৱাৰ সম্ভাৱনা থাকে ৷ মধুমেহ ৰোগে লাহে লাহে হৃদয়, কিডনি, চকুৰ দৃষ্টিশক্তি আদিৰ ওপৰত প্ৰভাৱ পেলাই ক্ৰমান্বয়ে ৰোগীক জটিল অৱস্থালৈ লৈ যায় ৷ আধুনিক জীৱন শৈলীও ডায়েবেটিছ হোৱাৰ এক কাৰণ ৷
ডায়েবেটিছ ৰোগৰ লক্ষণসমূহ কি কি ?
১) ডায়েবেটিছ হ’লে ৰোগীগৰাকীৰ বাৰে বাৰে প্ৰস্ৰাৱ লাগি থকা যেন অনুভৱ হৈছে ৷
২) অধিক পানী পিয়াঁহ অনুভৱ হোৱা ৷
৩) ভোক বেছিকৈ লাগিব ৷
৪) ব্যক্তিগৰাকীৰ ওজন যথেষ্ট পৰিমাণে কমি যায় ৷
এইসমূহ এগৰাকী ডায়েবেটিছ ৰোগীৰ প্ৰাথমিক লক্ষণ ৷ ইয়াৰোপৰি কাহ, ভাইৰেল জ্বৰ, প্ৰস্ৰাৱ আদিৰ ইনফেকচন হলেও ডায়েবেটিছ হ'ব পাৰে ৷
ডায়েবেটিছ ৰোগী এগৰাকীয়ে কি খাদ্য গ্ৰহণ কৰিব ?
যি বিলাকত খাদ্যত কাৰ্বহাইড্রেট বেছি থাকে সেইবোৰ খাদ্য কম পৰিমাণে খাব লাগে ৷ আনহাতে কম ফাইভাৰ যুক্ত খাদ্য গ্ৰহণ কৰিব লাগে ৷ ৰুটি, ভাত, মিঠাই আদিত কাৰ্বহাইড্রেটৰ পৰিমাণ বেছি থাকে ৷ সেয়ে এই সমূহ খাদ্য কম পৰিমাণে গ্ৰহণ কৰিব লাগে ৷ মুঠৰ ওপৰত কম আৰু নিয়মিত পৰিমাণৰ খাদ্য গ্ৰহণ কৰিব পাৰে ৷
শিশুসকলৰ ডায়েবেটিছৰ লক্ষণ কি ?
বয়স্ক লোকতকৈ শিশুসকলৰ ডায়েবেটিছ অকণমান বেলেগ ধৰণৰ ৷ শিশুসকলৰ ডায়েবেটিছক টাইপ ওৱান ডায়েবেটিছ বুলি কোৱা হয় ৷ দুবছৰীয়া শিশুৰ দেহটো ডায়েবেটিছ হোৱা দেখা যায় ৷ শিশুসকলৰ ক্ষেত্ৰত ইনচুলিনৰ অভাৱ হলে ডায়েবেটিছ হোৱা দেখা যায় ৷ শিশুসকলৰ ডায়েবেটিছ ধৰা পৰাৰ প্ৰথম দিনাৰ পৰাই তেওঁলোকে ইনচুলিন ব্যৱহাৰ কৰিব লাগে ৷
