যদি এজন লোকৰ মুখৰ ভিতৰখন লেতেৰা হৈ থাকে, তেন্তে অতি সোনকালে তেওঁ গুৰুতৰ ৰোগত আক্ৰান্ত হ’ব পাৰে ৷ এয়া পিছে আমি কোৱা কথা নহয় ৷ এই মত স্বাস্থ্য বিশেষজ্ঞৰ ৷ সেয়েহে, মুখৰ পৰিস্কাৰ-পৰিচ্ছন্নতাৰ প্ৰতি সদায় যত্ন লোৱাটো খুবেই জৰুৰী ৷ মুখৰ ভিতৰখন পৰিস্কাৰ কৰিবলৈ ৰাতিপুৱা শোৱাৰ পৰা উঠাৰ পিছত আৰু ৰাতি টোপনি যোৱাৰ আগতে দাঁত ব্ৰাছ কৰিব লাগে ৷ ই মুখত থকা বেক্টেৰিয়া আৰু বীজাণু পৰিস্কাৰ কৰে ৷ অন্যথা এই বেক্টেৰিয়াবোৰ পাকস্থলীলৈ যায় ৷ যাৰ ফলত আমাৰ বহু গুৰুতৰ স্বাস্থ্যৰ সমস্যা হ'ব পাৰে ৷ আজিকালি বহু লোকেই ব্ৰাছ নকৰাকৈ ‘বেড টি’ বা আন খাদ্য গ্ৰহণ কৰে ৷ ব্ৰাছ নকৰাকৈ খাদ্য খোৱাৰ ফলত স্বাস্থ্যৰ পক্ষে কেনে ধৰণৰ সমস্যাৰ উদ্ভৱ হ’ব পাৰে, আজি জানো আহক-
হৃদৰোগৰ আশংকা
স্বাস্থ্য বিশেষজ্ঞসকলৰ মতে, ব্ৰাছ নকৰাকৈ খোৱাৰ ফলত হৃদযন্ত্ৰ সম্পৰ্কীয় ৰোগৰ আশংকা বৃদ্ধি হয় ৷ দাঁতত জমা হোৱা প্লেক, বেক্টেৰিয়া আৰু লেতেৰা শৰীৰলৈ যায় আৰু হৃদযন্ত্ৰৰ স্নায়ু অৱৰোধ কৰে ৷ ইয়াৰ ফলত হৃদযন্ত্ৰলৈ ৰক্ত সঞ্চালনো হ্ৰাস হয় আৰু হৃদৰোগ আশংকা বৃদ্ধি হয় ৷
মুখৰ গোন্ধ
যেতিয়াই আমি ৰাতিপুৱা সাৰ পাওঁ, মুখৰ পৰা দুৰ্গন্ধ ওলায় ৷ ইয়াৰ কাৰণ হৈছে যে ৰাতি আপোনাৰ মুখখন আপুনি পৰিস্কাৰ কৰা নাই ৷ৰাতিপুৱা-ৰাতি ব্ৰাছ কৰাৰ ফলত মুখৰ গোন্ধ আঁতৰ হয় আৰু উশাহ সতেজ হয় ৷
গৰ্ভৱতী মহিলাৰ ক্ষতি
যদি গৰ্ভৱতী মহিলাই ব্ৰাছ নকৰাকৈ যদি কিবা খায়, ই কেৱল তেওঁলোকৰ স্বাস্থ্যই নহয়, গৰ্ভত থকা শিশুৰ স্বাস্থ্যকো প্ৰভাৱিত কৰে ৷ ইয়াৰ ফলত অকাল প্ৰসৱ, সন্তানৰ জন্মৰ সময়ত ওজন কম তথা শিশুটোৰ আন বহুতো সমস্যা হ'ব পাৰে ৷
দাঁতৰ গুৰি দুৰ্বল
দৈনিক সঠিক ৰূপত ব্ৰাছ নকৰাৰ ফলত দাঁতৰ গুৰিৰ সমস্যাই ভয়াৱহ ৰূপ ধাৰণ কৰিব পাৰে ৷ বিশেষকৈ ইয়াৰ ফলত দাঁতৰ গুৰি দুৰ্বল হৈ পৰে ৷ ক্ষতিকাৰক বেক্টেৰিয়াৰ ফলত দাঁতৰ গুৰি ফুলা, ৰক্তক্ষৰণৰ দৰে সমস্যাও উদ্ভৱ হব পাৰে ৷ সেয়েহে, সদায় ৰাতিপুৱা-ৰাতি ব্ৰাছ কৰিব লাগে ৷
লগতে পঢ়ক: Bhagyashree Diet: নিজকে সুস্থ ৰাখিবলৈ এই আহাৰ গ্ৰহণ কৰে মেইনে প্যাৰ কিয়াৰ অভিনেত্ৰী ভাগ্যশ্ৰীয়ে?
