অন্তৰ্বাস যাক আমি সাধাৰণ ভাষাত আণ্ডাৰগাৰ্মেণ্ট বুলি কও ই সকলোৰে বাবে এটি প্ৰয়োজনীয় বস্ত্ৰ ৷ ক্ৰয় কৰাৰ সময়ত ইয়াৰ বাবে আকৰ্ষণীয় বা ধুনীয়া হোৱাটো প্ৰয়োজনীয় নহয়, ইয়াৰ ফিটিং, কাপোৰৰ মেটেৰিয়েল আৰু আৰামৰ প্ৰতিহে বিশেষ গুৰুত্ব দিয়াটো উচিত ৷ কিন্তু আজিকালি এটা নিখুঁত আকৃতিৰ বাবে শ্বেপৱেৰ পৰিধান কৰাৰ লগতে মানুহে টান অন্তৰ্বাস পিন্ধিবলৈ আৰম্ভ কৰিছে, আনহাতে বহুলোকে বিভিন্ন ধৰণৰ কাপোৰ পৰিধান কৰে যদিও, অন্তৰ্বাস সলনি নকৰে ৷
কিন্তু আপুনি জানেনে যে এই সৰু অসাৱধানতাৰ বাবে আপুনি বহুতো গুৰুতৰ পৰিণতিৰ সন্মুখীন হ’বলগীয়া হ’ব পাৰে ? যদি নাজানে, তেন্তে তলত ইয়াৰ বিষয়ে জানি লওক-
ছাল চিগিব পাৰে
অতি টান অন্তৰ্বাস পৰিধান কৰিলে পেলভিক অংশৰ চাৰিওফালৰ অংশৰ ছাল চিগিব পাৰে ৷ যাৰ বাবে বিষৰ লগতে তীব্ৰ খজুৱতিও অনুভৱ হয় ৷ সময় থাকোঁতে ইয়াৰ ওপৰত গুৰুত্ব নিদিলে পিছলৈ ঘাঁৰ সমস্যাও সৃষ্টি হ’ব পাৰে ৷ ব্যক্তিগত অংশৰ বাহিৰেও কঁকালত গভীৰ দাগ গঢ় লৈ উঠে ৷ যিটো স্পৰ্শ কৰিলেই বিষ অনুভৱ হয় ৷
তেজৰ চলাচল বন্ধ হ’ব পাৰে
যদি আপুনি অতিকৈ টান অন্তৰ্বাস পৰিধান কৰে তেন্তে ই উৰুৰ ওপৰৰ অংশত তেজ চলাচলত বাধাৰ সৃষ্টি কৰিব পাৰে ৷ যাৰ বাবে উৰুৰ লগতে আন অংগসমূহৰ কাৰ্য্যক্ষমতাও প্ৰভাৱিত হ’ব পাৰে ৷ তেজৰ সঠিক পৰিসঞ্চালন নোহোৱাৰ বাবে ভৰি দুখন সংজ্ঞাহীন হৈ পৰিব পাৰে ৷ এই পৰিস্থিতিক সহজভাৱে লোৱাৰ ভুল নকৰিব কাৰণ ইয়াৰ ফলত খোজ কঢ়াতো অসুবিধা হ’ব পাৰে ৷
বেক্টেৰিয়াৰ সংক্ৰমণৰ আশংকা
টান অন্তৰ্বাস পিন্ধিলে ব্যক্তিগত স্থানত বায়ু চলাচলত বাধা দিয়ে, যাৰ বাবে ঘাম শুকাই নাযায় আৰু ইয়াৰ বাবে বেক্টেৰিয়াৰ সংক্ৰমণৰ সম্ভাৱনা বৃদ্ধি পাব পাৰে ৷
এচিড ৰিফ্লাক্সৰ সমস্যা
তদুপৰি টান অন্তৰ্বাস পৰিধান কৰিলে পেটটোত হেঁচা পৰে ৷ যাৰ ফলত এচিডিটিৰ সমস্যাৰ সৃষ্টি হ’ব পাৰে ৷ সেয়েহে টাইট আণ্ডাৰৱেৰ পৰিধান কৰাটোও পৰিহাৰ কৰক ৷
লগতে পঢ়ক: Anjeer Water Benefits: পুৱা খালী পেটত ডিমৰু ভিজোৱা পানী কিয় খাব লাগে ? ইয়াৰ আচৰিত উপকাৰিতা জানি লওক
