ওদালগুৰি, 20 চেপ্টেম্বৰ : ওদালগুৰি জিলাৰ মাজবাট থানাৰ অন্তৰ্গত ওজাগড়ত বৃহস্পতিবাৰে পথৰ কাষত থকা ১১ হাজাৰ ভল্টৰ বিদ্যুৎ পৰিবাহী তাঁৰত লাগি জ্বলি উঠে এখন চলন্ত ডাম্পাৰ ৷ এই ঘটনাত থিতাতে নিহত হয় চন্দ্ৰ বসুমতাৰী নামৰ ডাম্পাৰখনৰ চালক ৷ বিদ্যুৎপৃষ্ট ডাম্পাৰখনৰ নম্বৰৰ এ এছ-27 চি 5417 ৷
নিহত চালকজনৰ ঘৰ ওৰাঙৰ ভোগদলত । স্থানীয় লোকে পথৰ কাষত ওলমি থকা বিদ্যুৎ পৰিবাহী তাঁৰে যিকোনো বিপদ ঘটাব পাৰে বুলি শংকিত হৈ বিদ্যুৎ বিভাগক অৱগত কৰিছিল যদিও মাজবাট সংমণ্ডল বিদ্যুৎ বিভাগে কোনো গুৰুত্ব প্ৰদান কৰা নাছিল । বিদ্যুৎ বিভাগৰ চূড়ান্ত হেমাহিতাৰ বাবে চন্দ্ৰ বসুমতাৰী নামৰ চালক জনে কৰুণ মৃত্যুক সাৱতিলগলগীয়া হয় বুলি গাঁৱৰ লোকে অভিযোগ উত্থাপন কৰে ৷ আনহাতে ঘটনা সংঘটিত হোৱাৰ কথা মাজবাট সংমণ্ডল বিদ্যুৎ বিভাগক অৱগত কৰাৰ বহু সময়ৰ পাছতো বিদ্যুৎ বিভাগৰ কোনো লোক ঘটনাস্থলীত উপস্থিত নোহোৱাত বিভাগটোৰ ওপৰত খৰ্গহস্ত হৈ পৰিছে ওজাগড় গাঁৱৰ লোকসকল ।
