ৰৌতা,1 জুন: ৰাজ্যৰ বিভিন্ন প্ৰান্তৰ সমান্তৰালকৈ ওদালগুৰিৰ চন্দনা চাহ বাগিচাত ক্ৰমাৎ বৃদ্ধি হৈছে ক’ভিডত আক্ৰান্ত হোৱা লোকৰ সংখ্যা ৷ যাৰ বাবে জিলা প্ৰশাসনে জাৰি কৰিছে কেতবোৰ নীতি-নিৰ্দেশনা ৷ চাহ বাগিচাখনৰ বহু কেইটা স্থানক প্ৰশাসনে ঘোষণা কৰিছে কণ্টেইনমেণ্ট জ’ন হিচাপে ৷
মঙলদৈ লোকসভা সমষ্টিৰ সাংসদ দিলীপ শইকীয়াই সোমবাৰে ওদালগুৰিৰ চন্দনা চাহ বাগিচাত থকা কণ্টেইনমেণ্ট জ’নৰ কেবাটাও পৰিয়ালক খাদ্য সামগ্ৰী, মাস্ক, ছেনিটাইজাৰ আদি বিতৰণ কৰে । সাংসদ গৰাকীয়ে কণ্টেইনমেণ্ট জ’নত বাস কৰা পৰিয়াল কেইটাক খাদ্য সামগ্ৰীৰ অন্যান্য প্ৰয়োজনীয় সামগ্ৰী প্ৰদান কৰি লোকসকলক চৰকাৰে বান্ধি দিয়া ক’ভিড নীতি-নিৰ্দেশনা সমূহ মানি চলিবলৈ আহ্বান জনায় । সমান্তৰালকৈ উক্ত পৰিয়াল কেইটাক প্ৰতিষেধক গ্ৰহণ কৰিবলৈ পৰামৰ্শ দিয়ে ।
আনহাতে, উক্ত বাগিচাৰ শ্ৰমিকসকলক প্ৰতিষেধক প্ৰদানৰ সুবিধাৰ্থে বাগিচাখনত অতি শীঘ্ৰে এটি প্ৰতিষেধক প্ৰদান শিবিৰ আয়োজন কৰিবলৈ সাংসদ দিলীপ শইকীয়াই জিলা প্ৰশাসনক নিৰ্দেশ প্ৰদান কৰে ৷ সাংসদ গৰাকীৰ উক্ত পদক্ষেপত বাগিচাখনৰ শ্ৰমিকসকলে ধন্যবাদ জ্ঞাপন কৰে ।
লগতে পঢ়ক: কণ্টেইনমেণ্ট জ’নৰ ৪৭ টা পৰিয়ালক খাদ্য সামগ্ৰী বিতৰণ ৰকিবুল হুছেইনৰ
