ৰৌতা, 28 জুন: বড়োলেণ্ড বিশ্ববিদ্যালয়ত নিষিদ্ধ হ’ল অসমীয়া ভাষা । কেৱল ইংৰাজীতহে লিখিব পাৰিব শিক্ষাৰ্থীয়ে । বড়োলেণ্ড বিশ্ববিদ্যালয়ত ইংৰাজী ভাষাত লিখিব লাগিব মেজৰ পৰীক্ষাৰ উত্তৰ । বড়োলেণ্ডত নচলিব অসমীয়া, শিক্ষাৰ্থীয়ে লিখিব লাগিব ইংৰাজীত । অসমতেই অসমীয়া ভাষাৰ ওপৰত আন এক আঘাত হানি বড়োলেণ্ড বিশ্ববিদ্যালয়ে জাৰী কৰিলে জাননী ৷ বিশ্ববিদ্যালয়ৰ পাঠ্যক্ৰমৰ পৰা বিতাৰিত কৰা হ'ল অসমীয়া ভাষা । এতিয়াৰে পৰা অসমীয়া ভাষাত নোৱাৰিব লিখিব বিশ্ববিদ্যালয়খনৰ স্নাতক পৰ্যায়ৰ শিক্ষাৰ্থীয়ে । দিব নোৱাৰিব পৰীক্ষাও ।
শেহতীয়াকৈ অসমীয়া ভাষাৰ ওপৰত ৰাজ্য চৰকাৰৰ পৃষ্ঠপোষকতাতে এটাৰ পিচত আন এটা আক্ৰমণ চলি থকাৰ মাজতে এইবাৰ কোকৰাঝাৰস্থিত বড়োলেণ্ড বিশ্ববিদ্যালয়ে অসমীয়া ভাষা প্ৰত্যাহাৰ কৰি নিজ ৰাজ্যখনতে গুৰুত্বহীন কৰিলে অসমীয়া ভাষাক । এক নিৰ্দেশনাৰ জৰিয়তে বিশ্ববিদ্যালয়খনৰ স্নাতক বৰ্ষৰ শিক্ষাৰ্থী আৰু বিশ্ববিদ্যালয়খনৰ অধীনস্থ মুঠ 59 খন মহাবিদ্যালয়ৰ স্নাতক শিক্ষাৰ্থীসকলে এতিয়াৰে পৰা কেৱল ইংৰাজীতহে লিখিব পাৰিব বুলি জনাইছে । কেৱল এম আই এলৰ ক্ষেত্ৰতহে এই নতুন নিৰ্দেশনা কাৰ্যকৰী নহ'ব ।
লগতে পঢ়ক: Online fraud: কানাডিয়ান ছলাৰ এপে একে নিশাই লুটিলে মাজুলীৰ একাংশৰ বহু কোটি টকা
বিশ্ববিদ্যালয়খনৰ শৈক্ষিক পৰিষদৰ 28 মাৰ্চৰ বৈঠকত এই বিষয়ে সিদ্ধান্ত গ্ৰহণ কৰা হৈছিল । এই সিদ্ধান্তত অনুমোদন জনাইছিল বিশ্ববিদ্যালয়খনৰ উপাচাৰ্যগৰাকীয়ে । সেই অনুসৰিয়েই এতিয়াৰে পৰা বিশ্ববিদ্যালয়খনৰ লগতে ইয়াৰ অধীনস্থ 59 খন মহাবিদ্যালয়ৰ স্নাতক পৰ্যায়ৰ গুৰু বিষয়কে (Major) ধৰি সকলো পাঠ্যক্ৰমৰ শিক্ষাৰ্থীয়ে কেৱল ইংৰাজী ভাষাতহে লিখিব পাৰিব ।
ইয়াৰ পিচতে প্ৰতিক্ৰিয়া সৃষ্টি হৈছে সমগ্ৰ BTR অঞ্চলত ৷ এই সম্পৰ্কত প্ৰতিক্ৰিয়া প্ৰকাশ কৰিছে বহুকেইটা ছাত্ৰ সংগঠনৰ লগতে ছাত্ৰ-ছাত্ৰী সকলে ৷ 24 ঘন্টাৰ ভিতৰতে এই সিদ্ধান্ত বাতিল নকৰিলে পৰবৰ্তী সময়ত তীব্ৰ গণতান্ত্ৰিক আন্দোলন গঢ়ি তোলাৰ হুংকাৰ ছাত্ৰ সংগঠনৰ লগতে ছাত্ৰ সমাজৰ ।
