ওদালগুৰিৰ পানেৰীত প্ৰাক্তন আছু নেতাক আক্ৰমণ অচিনাক্ত দুৰ্বৃত্তৰ

বাইকত অহা দুজন অচিনাক্ত যুৱকে টংলা আঞ্চলিক ছাত্ৰ সন্থাৰ প্ৰাক্তন উপ-সভাপতি ইণ্টাজুল ইছলামক লক্ষ্য কৰি শিলাবৰ্ষণ কৰে ৷ ওদালগুৰি জিলাৰ পানেৰীৰ সমীপৱৰ্তী খ্ৰীষ্টানাপাৰাত সংঘটিত হয় উক্ত ঘটনা । ঘটনাটোত আহত হৈছে ইণ্টাজুল ইছলামকে ধৰি গাড়ীখনত থকা অন্য দুজন লোক ৷

ওদালগুৰি,2 জানুৱাৰীঃ ওদালগুৰিত আক্ৰমণৰ সন্মুখীন হৈছে এগৰাকী প্ৰাক্তন আছু নেতা ৷ টংলা আঞ্চলিক ছাত্ৰ সন্থাৰ প্ৰাক্তন উপ-সভাপতি ইণ্টাজুল ইছলামক অচিনাক্ত দুৰ্বৃত্তই বৃহস্পতিবাৰে আক্ৰমণ কৰে । ঘটনাৰ বিৱৰণী মতে,বাইকত অহা দুজন অচিনাক্ত যুৱকে নেতাজনে ব্যৱহাৰ কৰা গাড়ীখনলৈ শিলাবৰ্ষণ কৰে ৷ ওদালগুৰি জিলাৰ পানেৰীৰ সমীপৱৰ্তী খ্ৰীষ্টানাপাৰাত সংঘটিত হয় উক্ত ঘটনাটো । আছুনেতা ইণ্টাজুলে দুজন বন্ধুৰ সৈতে নিজ বাহনেৰে ওদালগুৰিৰ পৰা পানেৰীস্থিত ঘৰলৈ আহি থকা অৱস্থাত ঘটনাটো সংঘটিত হয় ৷ ইতিমধ্যে অঞ্চলজুৰি নেতাজনক লক্ষ্য কৰি গুলীচালনা কৰা বুলি প্ৰচাৰ হৈছে যদিও গুলীচালনাৰ কোনো প্ৰমাণ লাভ কৰা নাই আৰক্ষীয়ে ৷

ঘটনাটোৰ ফলত আছু নেতাজনৰ গাড়ীখন সামান্য পৰিমাণে ক্ষতিগ্ৰস্ত হৈছে । লগতে আহত হৈছে ইণ্টাজুল ইছলামকে ধৰি গাড়ীখনত থকা অন্য দুজন লোক ৷ ওদালগুৰি আৰক্ষীয়ে ইতিমধ্যে সমগ্ৰ ঘটনাটোৰ তদন্ত আৰম্ভ কৰিছে ৷ ঘটনাটোৰ ফলত অঞ্চলজুৰি তীব্ৰ চাঞ্চল্যৰ সৃষ্টি হৈছে ৷

লগতে চাওকঃপ্ৰাক্তন আৰক্ষী সঞ্চালক প্ৰধান কুলধৰ শইকীয়া সাহিত্য সভাৰ নৱনিৰ্বাচিত সভাপতি