ডুমডুমা,13 ফেব্ৰুৱাৰীঃ তিনিচুকীয়াৰ ১২৬ নং শদিয়া বিধানসভা সমষ্টিৰ অন্তৰ্গত হাঁহখাটি পঞ্চায়তৰ মালভূগ, বগৰীবাৰী অঞ্চলসমূহত স্বাধীনতাৰ 74 বছৰৰ পিছতো আজিও উন্নয়নে ঢুকি পোৱা নাই । যাতায়াত-যোগাযোগ, স্বাস্থ্য-শিক্ষা সকলো দিশতেই অঞ্চলটো পিছপৰি ৰোৱা দেখা গৈছে ৷ উল্লেখ্য যে, প্ৰতি বছৰে ব্ৰহ্মপুত্ৰ নদীৰ বান-খহনীয়াই সৰ্বস্বান্ত কৰা এই অঞ্চলটোৰ লগতে স্থানীয় লোকসকলৰ উন্নয়নৰ বাবে চৰকাৰ তথা জন প্ৰতিনিধিয়ে কোনো ধৰণৰ বিশেষ ব্যৱস্থা গ্ৰহণ নকৰাৰ অভিযোগ কৰে স্থানীয় লোকসকলে ।
আনহাতে, নিৰ্বাচনৰ প্ৰাক-মুহুৰ্তত ৰাজনৈতিক নেতাসকল আহি অঞ্চলটোৰ উন্নয়নৰ প্ৰতিশ্ৰুতি দিয়ে, যদিও নিৰ্বাচনৰ পাছতেই সকলো প্ৰতিশ্ৰুতি ফুটুকাৰ ফেনত পৰিণত হয় । উপায়ন্তৰ অঞ্চলবাসীয়ে স্থানীয় বিধায়কগৰাকীৰ বিৰুদ্ধে প্ৰতিবাদ সাব্যস্ত কৰা দেখা গৈছে । একেদৰে বিধায়ক বলীন চেতিয়াই সমষ্টিটোত কেৱল মাত্ৰ আধাৰশিলাৰ ৰাজনীতি কৰাৰহে অভিযোগ উত্থাপন কৰিছে স্থানীয় ৰাইজে ।
অঞ্চলটোত ১৯৮৪ চনতে স্থাপিত বগৰীবাৰী প্ৰাথমিক বিদ্যালয়খন চৰকাৰে আজিকোপতি প্ৰাদেশিকীকৰণৰ ব্যৱস্থা নকৰিলে । ইপিনে নিৰ্বাচনৰ পূৰ্বে অঞ্চলটোৰ উন্নয়নৰ ক্ষেত্ৰত চৰকাৰ তথা স্থানীয় বিধায়কগৰাকীয়ে কোনো বিশেষ ব্যৱস্থা গ্ৰহণ নকৰিলে, অঞ্চলটোৰ ৰাইজে সমাগত বিধানসভা নিৰ্বাচনত ভোট বৰ্জনৰ হুংকাৰ প্ৰদান কৰিছে ।
লগতে পঢ়কঃ লক্ষ্য 21 ৰ নিৰ্বাচন: শিৱসাগৰত অসম বচাওঁ আহক কাৰ্যসূচী
