ডুমডুমা, ১২ মে': তিনিচুকীয়া জিলাৰ তালাপৰ আৰক্ষী চকীৰ অন্তৰ্গত ককৰাতলি মঙলবাৰে চিপ লৈ থকা অৱস্থাত উদ্ধাৰ হয় এজন যুৱকৰ মৃতদেহ । ঘটনাস্থলীত তালাপ আৰক্ষী উপস্থিত হৈ উদ্ধাৰ কৰে ৩৪ বছৰীয়া যুৱকজনৰ মৃতদেহ । যুৱকজন ককৰাতলিৰ অধিৰ দেৱনাথৰ পুত্ৰ বিজু দেৱনাথ বুলি জানিব পৰা গৈছে ।
প্ৰাপ্ত তথ্য অনুসৰি, পৰিয়ালৰ লোকৰ সকলো সদস্যই পুৱাই মহামাৰী কৰ'ণা প্ৰতিষেধক গ্ৰহণ কৰিবলৈ গৈছিল । সেই ছেগতে ঘৰত কোনো নথকাৰ সুযোগ গ্ৰহণ কৰি ঘৰৰ দুৱাৰত চিপ লৈ আত্মহত্যাৰ পথ বাছি লয় যুৱকজনে ।
অৱশ্যে বৰ্তমানো যুৱকজনৰ আত্মহননৰ কাৰণ জানিব পৰা হোৱা নাই ৷ পৰৱৰ্তী সময়ত পৰিয়ালৰ লোকে আৰক্ষীক খবৰ দিয়াৰ তালাপ আৰক্ষী ঘটনাস্থলীত উপস্থিত হয় । আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে তিনিচুকীয়ালৈ প্ৰেৰণ কৰে যুৱকজনৰ মৃতদেহ ৷ ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে ।
