তিনিচুকীয়া, 25 ফেব্ৰুৱাৰী: ৰাছিয়া-ইউক্ৰেইনৰ মাজত যুদ্ধৰ অৱতাৰণা হোৱাৰ লগেলগে শংকিত হৈ পৰিছে ইউক্ৰেইনত অধ্যয়ণৰত ভাৰত তথা অসমৰ শিক্ষাৰ্থীসকল (Assamese students in Ukraine) ৷ এক চৰকাৰী তথ্য অনুসৰি অসমৰে প্ৰায় 100 গৰাকী শিক্ষাৰ্থী বৰ্তমান আৱদ্ধ হৈ পৰিছে ইউক্ৰেইনত ৷ যাৰ ফলত উদ্বিগ্নতাৰ মাজত আছে শিক্ষাৰ্থীসকলৰ লগতে তেওলোকৰ পৰিয়ালবৰ্গ ৷
তিনিচুকীয়া জিলাৰ ডিগবৈৰ ছাত্ৰী ৰাজশ্ৰী বড়োও ইউক্ৰেইনত আৱদ্ধ হৈ পৰিছে (Tinsukia girl confined in Ukraine) ৷ বৃহস্পতিবাৰে সমগ্ৰ নিশাটো ভীতিগ্ৰস্ততাৰ মাজেৰে বাংকাৰতে কটাবলগীয়া হ’ল ৰাজশ্ৰীয়ে । ইউক্ৰেইনত যুদ্ধকালীন পৰিৱেশ সৃষ্টি হোৱাৰ পাছতে তিনিচুকীয়া জিলাৰ ডিগবৈৰ পৰিয়ালটোত এতিয়া হাহাকাৰ লাগিছে । ৰাজশ্ৰীক উদ্ধাৰ কৰিবলৈ ৰাজ্য চৰকাৰক আহ্বান জনাইছে পৰিয়ালে ।
উল্লেখ্য যে, যোৱা বৰ্ষৰ ছেপ্তেম্বৰ মাহত চিকিৎসা বিজ্ঞান অধ্যয়ণ কৰাৰ বাবে ইউক্ৰেইনলৈ গৈছিল ছাত্ৰীগৰাকী । বৰ্তমান ইউক্ৰেইনত বেংক আৰু এ টি এম বন্ধ হৈ থকাত আৰ্থিক সমস্যাতো পৰিছে ৰাজশ্ৰী । যৎপৰোনাস্তি চেষ্টা কৰিও ভাৰতৰ চৰকাৰৰ সৈতে যোগাযোগ কৰিব পৰা নাই ৰাজশ্ৰীয়ে ৷
আনহাতে মুখ্যমন্ত্ৰী ড৹ হিমন্ত বিশ্ব শৰ্মাই বৃহস্পতি এই সম্পৰ্কত মন্তব্য আগবঢ়ায় ৷ মুখ্যমন্ত্ৰীগৰাকীয়ে জানিবলৈ দিয়া অনুসৰি প্ৰায় 100 গৰাকী অসমীয়া শিক্ষাৰ্থীয়ে বৰ্তমান যুদ্ধভূমি ইউক্ৰেইনত আবদ্ধ হৈ আছে ৷ এইসকল শিক্ষাৰ্থীক উদ্ধাৰ কৰি অসমলৈ অনাৰ বাবে ইতিমধ্যে যাবতীয় কাম-কাজ আগবঢ়োৱা হৈছে ৷ অসম চৰকাৰৰ ফালৰ পৰা বৈদেশিক পৰিক্ৰমা মন্ত্ৰালয়ৰ সৈতেও আলোচনা কৰা হৈছে ৷
লগতে পঢ়ক: Russia Ukraine crisis: ইউক্ৰেইনত আৱদ্ধ অসমৰ শিক্ষাৰ্থীক প্ৰত্যাৱৰ্তনৰ চেষ্টা ৰাজ্য চৰকাৰৰ
