শদিয়া, 11 ফেব্ৰুৱাৰীঃ ১৪ বছৰ আগতেই ৰাষ্ট্ৰযন্ত্ৰৰ বলি হোৱা শ্বহীদৰ স্মৃতি ৰূপে সোমবাৰে কাকপথাৰৰ ডিৰাক চাৰিআলিত আয়োজন কৰা হয় সংকল্প দিৱস ৷ ২০০৬ চনৰ 10 ফেব্ৰুৱাৰীৰ দিনটোতে কাকপথাৰত ৰাষ্ট্ৰযন্ত্ৰৰ বলি বনাই হত্যা কৰা হৈঠিল ৯ জনকৈ নিৰপৰাধী ব্যক্তিক ৷ ডিৰাক সোণজানৰ অজিত মহন্ত নামৰ ব্যক্তিজনক ২০০৬ চনৰ ৪ ফ্ৰেব্ৰুৱাৰীৰ সন্ধিয়া সেনাবাহিনীৰ ১৩নং গোৰ্খা ৰেজিমেন্টে নিৰ্মমভাৱে হত্যা কৰাৰ প্ৰতিবাদত কেইবাদিনো পথ অৱৰোধ কৰাৰ অন্তত ন্যায় বিচাৰি প্ৰায় বিশ সহস্ৰাধিক ৰাইজে কাকপথাৰৰ অভিমুখে ৰাওনা হৈছিল ৷
উল্লেখ্য যে কাকপথাৰ চহৰৰ পৰা প্ৰায় তিনি কি:মি: নিলগত লাজুমত সংঘটিত হৈছিল সেই দেশ কঁপোৱা হত্যাকাণ্ডটো ৷ লাজুমতে প্ৰতিবাদকাৰীৰ ওপৰত নিৰ্বিচাৰ গুলীচালনা কৰিছিল সেনাবাহিনীয়ে ৷ থিতাতে নিহত হৈছিল ৮ জনকৈ নিৰীহৰ ৷ আনহাতে উন্নত চিকিৎসাৰ বাবে দিল্লীলৈ প্ৰেৰণ কৰা মনিকা মৰাণ নামৰ মহিলাগৰাকী মৃত্যুক আঁকোৱালি লৈছিল চিকিৎসালয়তে ৷ ভাৰতীয় সেনাৰ নিৰ্বিচাৰ গুলীবৰ্ষনত নিহত হৈছিল ক্ৰমে মাধুৰ্য গোহাঁই, দিপন মৰাণ, অনিন্দিতা মুণ্ডা, বিউতী গোহাঁই, কুঞ্জলতা মৰাণ, পখিলী বৰা, ৱাহিদা আহমেদ আৰু গোলাপ বাইলুং ৷
আনহাতে সমগ্ৰ ঘটনাটোত অজিত মহন্ত সহিতে মুঠ ১০ গৰাকী নিৰীহে মৃত্যুবৰণ কৰিবলগীয়া হৈছিল ৷ ৰাজ্যৰ বিভিন্ন দল সংগঠনে সেইসময়ত মৃতকসকলক জাতীয় শ্বহীদ ঘোষণা কৰিছিল ৷ ৰাজ্য চৰকাৰে ঘোষণা কৰা মতে মৃতকসকলৰ পৰিয়ালবৰ্গলৈ এটাকৈ চৰকাৰী চাকৰি আৰু আহত সকলক এককালীন সাহায্য আগবঢ়োৱা হৈছে ৷ কিন্তু বৰ্তমান পাহৰণিৰ গৰ্ভত সেই শ্বহীদসকল ৷ শ্বহীদ বেদীসমুহৰ অৱস্থা জৰাৰ্জীণ ৷ এক কদৰ্যময় পৰিৱেশে বিৰাজ কৰিছে শ্বহীদবেদী সমূহত ৷ তথাপি কাণসাৰ নাই চৰকাৰ তথা দল-সংগঠনৰ ৷ আজি ১৪ বৰ্ষ অতিক্ৰম কৰা সময়ত অঞ্চলটোৰ মৰাণ ছাত্ৰ সন্থা, আছু, যুৱ ছাত্ৰ পৰিষদৰ কৰ্মকতাই শ্বহীদসকলৰ পৰিয়ালবৰ্গক লৈ স্মৰণ কৰে জাতীয় শ্বহীদসকলক ৷ আকৌ সংকল্প লয় শ্বহীদসকলৰ স্মৃতি জীয়াই ৰখাৰ ৷ সংকল্প দিৱসত উপস্থিত থাকি মৰাণ ছাত্ৰ সন্থাৰ সভাপতি অৰুণজ্যোতি মৰাণে শ্বহীদসকলক স্মৰণ কৰি শ্বহীদস্থলীৰ পৰাই আলফা-চৰকাৰৰ আলোচনাই ৰাজ্যলৈ শান্তি আনিব বুলি আশাবাদী ৷ ইয়াৰোপৰি শ্বহীদসকলৰ বেদীসমুহ ভালকৈ নিৰ্মাণ কৰি তেওঁলোকৰ স্মৃতি জীয়াই ৰখাৰ আহ্বান জনাইছে সচেতন মহলে ৷
আৰু পঢ়কঃআলফাক শান্তি আলোচনালৈ আহিবলৈ আহ্বান মুখ্যমন্ত্ৰী সোণোৱালৰ
