ৰঙাপৰা, ডিগবৈ, 23 চেপ্টেম্বৰ: শাৰদীয় উৎসৱৰ আগে আগে বোনাচৰ দাবীত দুখনকৈ চাহবাগিচাত শ্ৰমিকে প্ৰতিবাদী কাৰ্য্যসূচীৰে উত্তাল পৰিস্থিতিৰ সৃষ্টি কৰিছে ৷ তেজপুৰ ৰঙাপৰাৰ নাহৰনি চাহ বাগিচাত বোনাচক কেন্দ্ৰ কৰি সোমবাৰে এক উত্তপ্ত পৰিস্থিতিৰ সৃষ্টি হয় । চাহ বাগিচা কৰ্তৃপক্ষই বাগিচাখনৰ শ্ৰমিক সকলক ২০ শতাংশ বোনাচ দুটা ভাগত দিয়াৰ সিদ্ধান্ত কৰে । পূজাৰ আগত ১৫ শতাংশ আৰু মাঘ বিহুৰ সময়ত ৫ শতাংশ বোনাচ প্ৰদান কৰাৰ সিন্ধান্তক কেন্দ্ৰ কৰি এক উত্তাপ্ত পৰিস্থিতিৰ সৃষ্টি হয় ৷
বাগিচাৰ কেইবাশ শ্ৰমিকে বিভিন্ন প্ৰতিবাদী শ্ল’গানেৰে বাগিচা কৰ্তৃপক্ষৰ বিৰুদ্ধে ক্ষোভ উজাৰি বাগিচাখনৰ কাৰ্যালয় ঘেৰাও কৰে আৰু প্ৰতিবাদকাৰীসকলে শীঘ্ৰে ২০ শতাংশ বোনাচ প্ৰদান কৰাৰ দাবীৰে পৰিবেশ উত্তাল কৰি তোলে ৷ বিগত বৰ্ষত বাগিচা কৰ্তপক্ষই বাগিচাখনৰ শ্ৰমিকক ২০ শতাংশ বোনাচ প্ৰদান কৰিছিল যদিও এইবাৰ দুটা ভাগত ২০ শতাংশ বোনাচ শ্ৰমিকসকলক দিয়াৰ সিদ্ধান্ত কৰ্তৃপক্ষই জানিবলৈ দিয়াত বাগিচাখলৰ শ্ৰমিকসকল ক্ষুব্ধ হৈ পৰে ৷ শ্ৰমিকসকলে পুজাৰ আগতে ২০ শতাংশ বোনাচৰ দাবী কৰিছে ৷ পৰিস্থিতি অধিক উতপ্ত হোৱাৰ বাবে ৰঙাপৰা আৰক্ষী থানাৰ এটি দল বাগিচাখনত উপস্থিত হৈ পৰিস্থিতি নিয়ন্ত্ৰণৰ চেষ্টা চলায় ।
ইপিনে, ডিগবৈৰ পাৱৈ চাহ বাগিছাতো সোমবাৰে উত্তপ্ত পৰিস্থিতিৰ ৷ 20% বোনাছৰ দাবীত বাগিছাৰ সকলো চাহ শ্ৰমিকে বাগিচাৰ ফেক্টৰীৰ প্ৰৱেশ দ্বাৰত সোমবাৰে পুৱাৰে পৰা উত্তাল প্ৰতিবাদ সাব্যস্ত কৰে ৷ বাগিছাৰ ফেক্টৰীৰ সন্মুখত সকলো শ্ৰমিকে কৰ্মবিৰতি পালন কৰি উত্তপ্ত পৰিস্থিতি সৃষ্টি কৰে ৷ চাহ শ্ৰমিক সকলে বহুত দিন ধৰি দাবী কৰি অহা 20% বনাচক লৈ টাটা কোম্পানীৰ পাৱৈ চাহ বাগিচাই শ্ৰমিকক দুই কিস্তিত বোনাচ দিব বিচাৰাটো শ্ৰমিকসকলে মানি লোৱা নাই ।
M. K. চাহ কোম্পানী দৰে আন কোম্পানীসমূহে যিহেতু চাহ শ্ৰমিকক একেলগে 20% বোনাচ দিবলৈ সক্ষম হৈছে কিন্তু টাটা কোম্পানীয়ে শ্ৰমিকসকলৰ অজ্ঞাতে ACMS ৰ লগত গোপন বুজাবুজিৰে দুটা কিস্তিত বোনাচ দিয়াৰ সিদ্ধান্ত লৈছে ৷ যিটো শ্ৰমিকসকলে কোনোপধ্যেই মানি নলয় বুলি স্পষ্ট কৰি দিয়ে অসম চাহ জনজাতি ছাত্ৰ সন্থাৰ মাৰ্ঘেৰিটা শাখাই । পূজাৰ আগতে 20% বোনাচ নাপালে শ্ৰমিক সকলে এনেদৰেই কৰ্মবিৰতি অব্যাহত ৰাখিব বুলি সকীয়াই দিয়ে চাহ শ্ৰমিকে ।
