ডুমডুমা, 15 জুন : তিনিচুকীয়া জিলাৰ হাপজান শিক্ষা খণ্ডৰ অন্তৰ্গত এখন প্ৰাথমিক বিদ্যালয় । নাম দাইছাজান চাহ বাগিছা প্ৰাথমিক বিদ্যালয় ৷ বিদ্যালয়খনত নাই পৰ্যাপ্ত শ্ৰেণী কোঠা, নাই ডেস্ক-বেঞ্চ ৷ একেটা কোঠাতেই দুটাকৈ শ্ৰেণীৰ শিক্ষাৰ্থীয়ে একেলগে মাটিত বস্তা পাৰি বহি ছাত্ৰ-ছাত্ৰীয়ে গ্ৰহণ কৰে জীৱনৰ আদিপাঠ ৷ পৰিৱৰ্তনকামী বিজেপি নেতৃত্বাধীন ৰাজ্য চৰকাৰৰ দিনত চাহ বাগিছা অঞ্চলত বিশেষকৈ শিক্ষা ব্যৱস্থাটোৰ আমূল পৰিৱৰ্তন ঘটাৰ বিপৰীতে দিনক দিনে বৃদ্ধি পাবলৈ ধৰিছে সমস্যা ।
বিয়াগোম শিক্ষা বিভাগ আৰু চাহ বাগিছা কৰ্তৃপক্ষৰ চৰম হেমাহিৰ বাবে তালাপৰ দাইচাজান প্ৰাথমিক বিদ্যালয়খনত এনেদৰে শিক্ষাগ্ৰহণ কৰি আহিছে শিক্ষাৰ্থীয়ে ৷ ১৯৪৬ চনতে স্থাপিত হোৱা দাইছাজান চাহ বাগিছা প্ৰাথমিক বিদ্যালয়খনত পাঁচটাকৈ শ্ৰেণীৰ মুঠ ২২৭ গৰাকী ছাত্ৰ-ছাত্ৰী থকা বিদ্যালয়খনত অধিকাংক্ষই মাটিত বস্তা পাৰি গ্ৰহণ কৰে পাঠদান কাৰ্যসূচীৰ । ইফালে বিদ্যালয়খনৰ পাঁচটাকৈ শ্ৰেণীত ২২৭ জন ছাত্ৰ-ছাত্ৰীৰ পৰিৱৰ্তে আছে কেৱল তিনি গৰাকী শিক্ষক । বহুবাৰ বাগিছা কৰ্তৃপক্ষৰ লগতে বিভাগীয় কৰ্তৃপক্ষক বিষয়টোৰ সম্পৰ্কে অৱগত কৰোৱাৰ পাছতো কোনোধৰণৰ ব্যৱস্থা গ্ৰহণ নকৰাৰ অভিযোগ উত্থাপন কৰিছে শিক্ষকসকলৰ লগতে আদিবাসী ছাত্ৰ সন্থাই ।
